Policia e Durrësit ka ndaluar një person që dyshohet se mund të jetë vrasësi i Gazmend Çollakut, rrëmbyer në mes të Durrësit dhe më pas ekzekutuar raporton gazeta Panorama.
Sipas të dhënave të para, policia mendon se është afër zbardhjes së ngjarjes, ndonëse identiteti i të dyshuarit nuk bëhet ende i ditur. Çollaku u rrëmbye mbrëmjen e 5 janarit dhe mengjesin e ditës tjetër u gjet i vrarë me 4 plumba në kokë buze rrugës në Fushë–Krujë.
Fillimisht u ngritën dyshime se vrasja e Çollakut mund të kishte lidhje me vrasjen e dy të rinjve te Torra në Durrës, afro dy muaj më parë, apo dhe me përfshirjen e tij në një rrjet të trafikut të drogës. Por së fundmi, ka dyshime se vrasja ka për motiv një gjobë që kap shifrën e të paktën 800 mijë eurove vënë ndaj një biznesi në qytetin bregdetar.
Çollaku u mor peng më 5 janar në mes të Durrësit nga katër persona, që mbanin uniforma të ngjashme me të policisë. Pengmarrësit udhëtonin me një makinë “Audi” me targa gjermane. Policia e ndoqi mjetin deri në Marikaj, por më pas humbi gjurmët. Gazmend Çollaku u gjet disa orë më vonë, i vrarë dhe i hedhur anë rrugës në fshatin Murqin Krujë. Viktima ishte i lidhur këmbë e duar dhe pasi ishte keqtrajtuar, ishte qëlluar me disa plumba në kokë.
Mënyra se si është ekzekutuar, fakti që u gjet i lidhur në këmbë e duar, për hetuesit është një mesazh i fortë që vrasësit kanë dashur të dërgojnë. Ndërkaq, ka dyshime të forta se Gazmend Çollaku, i cili lëvizte me një makinë të blinduar, mund të jetë “marrë në pyetje” nga vrasësit, përpara se të ekzekutohej me katër plumba në kokë. Këto dyshime kanë lindur pasi Çollaku rezulton të jetë keqtrajtuar, madje i janë thyer këmbë e duar përpara se të qëllohej me plumba. Me sa duket, autorët kanë dashur të mësojnë prej tij të dhëna që mund t’u shërbenin për të arritur qëllimet e tyre kriminale. Këto dyshime bëhen edhe më të forta, tashmë që në dritë ka dalë një pistë e re në të cilën janë përqendruar hetimet./Panorama
