Policia e Vlorës ka identifikuar dhe ndaluar autorin e vendosjes së tritolit në një lokal në Ujë të Ftohtë disa ditë më parë.
Autori është filmuar nga kamerat e sigurisë në rrugë teksa ai shkon me biçikletë për të vendosur eksplozivin në lokalin e 73-vjeçares R.B.
Ngjarja ka ndodhur më 8 Dhjetor në orën 05:50.
Autori i dyshuar, tashmë i ndaluar dhe nga policia, është një 28-vjeçar me dy identitete, B.S. alias B.M., banues në lagjen “Isa Boletini”. Ai është person me precedent penal në fushën e narkotikëve dhe të vjedhjes.
Gjatë aksionit policor, 28-vjeçarit iu sekuestruan edhe dy telefona celular, një biçikletë dhe veshjet e përdorura gjatë ngjarjes.
Vijojnë hetimet për identifikimin dhe ndalimin e personave të tjerë të përfshirë në këtë veprimtari kriminale.
Materialet procedurale, iu referuan Prokurorisë për veprat penale “Shkatërrimi i pronës me eksploziv” dhe “Mbajtja pa leje e armëve dhe municioneve luftarake”.
