Gazment Bardhi është shprehur se nuk ka marrë pjesë në protestën e zhvilluar para Kryesisë së Kuvendit, duke thënë se ishte në zyrën e tij duke ndjekur mbledhjen e Këshillit të Mandateve që miratoi kërkesën e SPAK për lejimin e arrestimit të ish-kryeministrit Sali Berisha.
“Ne në Grupin Parlamentar diskutojmë për strategjitë më të mira për përballje me regjimin e Ramës. Secili prej nesh në mbledhje shprehim mendimet tona për rrugën më të mirë.
Në parim, e drejta për të protestuar është e drejtë kushtetuese. Personalisht mbështes protestat kundër regjimit të Ramës.
Nuk isha në protestë, kam qenë në zyrën time duke ndjekur mbledhjen e Këshillit të Mandateve”, tha Bardhi në studion e News24.
Në lidhje me pyetjen pse kundërshtoi në mbledhjen e grupit propozimin e Berishës për thirrjen e protestave, Bardhi tha se ndan dhe mendime ndryshe me ish-kryeministrin por dhe e respektojnë njëri-tjetrin.
“Unë dhe zoti Berisha mund të ndajmë mendime të ndryshme për shumë çështje. Kjo nuk është pas përçarje dhe as konflikt.
Jemi bashkë kundër regjimit të Edi Ramës dhe do ta shtrimë bashkimin e gjithë spektrit të opozitës edhe në segmente të tjera jashtë jetës parlamentare.
Secili brenda grupit parlamentar ka vendosmërinë për t’u përballur me regjimin e Edi Ramës.
Nuk e kemi ndërtuar akoma skenarin. Atë ditë ka një seancë plenare dhe ne duhet të jemi aty sigurisht nëse na lejojnë. Ne do të kemi pjesën tonë brenda sallës së seancave plenare”, tha ai./m.j
