Gloria Steinem, gazetare, autore dhe një nga figurat më të rëndësishme në lëvizjen feministe në Shtetet e Bashkuara, ka ndërruar jetë në moshën 92 vjeçare, duke lënë pas një karrierë që përfshin më shumë se gjashtë dekada në luftën për barazi dhe të drejtat e grave.
“Steinem u nda nga jeta në shtëpinë e saj në Nju Jork, e rrethuar nga shumë njerëz që i donte“, sipas një deklarate të postuar në llogarinë e saj zyrtare në Instagram. Deri në fund të jetës së saj, ajo vazhdoi të punonte dhe të fliste publikisht për çështjet e barazisë dhe të drejtave sociale.
E lindur më 25 mars 1934 në Toledo të Ohajos, Gloria Steinem u bë një nga figurat më të njohura të valës së dytë të feminizmit në Shtetet e Bashkuara. Si gazetare, shkrimtare dhe aktiviste politike, ajo luajti një rol të rëndësishëm në sjelljen e çështjeve të tilla si barazia gjinore, të drejtat riprodhuese dhe përfaqësimi politik i grave në qendër të debatit publik.
Ajo ishte bashkëthemeluese e revistës Ms. Magazine, e cila u bë një pikë referimi për lëvizjen feministe, si dhe e Grupit Kombëtar Politik të Grave, Fondacionit Ms. për Gratë dhe Qendrës së Medias së Grave.
Steinem u bë e njohur në vitet 1960 përmes punës së saj gazetareske dhe shpejt u shfaq si një nga zërat më me ndikim në lëvizjen amerikane të grave. Gjatë gjithë jetës së saj, ajo kombinoi gazetarinë me aktivizmin, duke udhëtuar për dekada në SHBA dhe jashtë vendit, duke marrë pjesë në fushata për barazi dhe duke folur publikisht për çështje që kanë të bëjnë me gratë, diskriminimin racor dhe të drejtat e njeriut.
Ajo e kishte përshkruar pjesën më të madhe të këtij udhëtimi në librin e saj “Jeta ime në rrugë”, ndërsa kishte shkruar edhe “Akte të shëmtuara dhe rebelime të përditshme”, “Revolucion nga brenda” dhe “E vërteta do t’ju çlirojë, por më parë do t’ju acarojë!”.
