Aktori i njohur Sam Neill, i cili u bë i famshëm në mbarë botën me rolet e tij në filmat “Jurassic Park”, “The Piano” dhe serialin “Peaky Blinders”, ka ndërruar jetë në moshën 78-vjeçare.
Lajmi u bë i ditur të hënën përmes një deklarate të publikuar në llogarinë e tij zyrtare në Instagram. Familja njoftoi se Neill u nda nga jeta në Sydney të Australisë, i rrethuar nga të afërmit e tij. Shkaku i vdekjes nuk është bërë publik.
Në deklaratë thuhet se humbja ishte e papritur, ndërsa familja theksoi se aktori ishte në remision nga kanceri, pasi më parë ishte diagnostikuar me limfomë angioimunoblastike të qelizave T, një formë e rrallë e kancerit të gjakut.
I lindur në vitin 1947 në Omagh të Irlandës së Veriut, Sam Neill u shpërngul me familjen në Zelandën e Re gjatë fëmijërisë. Ai ndërtoi një karrierë mbi pesë dekada në kinematografi, me më shumë se 150 role në filma dhe seriale.
Gjatë karrierës së tij ai luajti në filma të njohur si “The Hunt for Red October”, “Dead Calm”, “The Hunt for the Wilderpeople”, “Event Horizon”, “Peter Rabbit”, si dhe në seriale të suksesshme si “Peaky Blinders”, ku interpretoi personazhin e Major Chester Campbell, “The Tudors” dhe “The Twelve”.
Në vitin 2023, aktori publikoi autobiografinë e tij, ku zbuloi betejën me kancerin dhe trajtimin që kishte ndjekur. Edhe pse sëmundja kishte hyrë në remision, ai vijoi terapinë mujore deri në fund të jetës.
Homazhe për aktorin kanë bërë liderët e Zelandës së Re dhe Australisë, të cilët e cilësuan Sam Neill një ikonë të kinematografisë dhe një nga figurat që ndihmoi në promovimin e industrisë filmike të Zelandës së Re në mbarë botën. Sam Neill lë pas katër fëmijë dhe gjashtë nipër e mbesa.
