Trupat e disa shteteve anëtare të NATO-s, mes të cilave edhe shqiptare, kanë nisur një stërvitje disaditore në Maqedoninë e Veriut, duke realizuar hedhje me parashutë nga helikopteri, në bazën stërvitore në Krivolak.
Stërvitja kryesohet nga Shtetet e Bashkuara të Amerikës dhe në të marrin pjesë 9000 ushtarë nga 17 vende aleate dhe partnere.
Komanda e ushtrisë amerikane në Europë tha se stërvitja e quajtur “Swift Response” – “Përgjigja e shpejtë”, do të shërbejë për të treguar aftësinë e personelit ushtarak amerikan në operacione ajrore nga Rrethi Arktik deri në Ballkan.
Stërvitja në fjalë ka nisur më 2 maj dhe do të zgjasë deri më 20 maj. Sipas Komandës së ushtrisë amerikane në Europë, stërvitja nuk ka lidhje me ndonjë kërcënim të mundshëm, edhe pse çdo aktivitet ushtarak i forcave të NATO-s tërheq vëmendje për shkak të luftës në Ukrainë.
/a.r
