Sekretari i përgjithshëm i NATO-s, Jens Stoltenberg dënoi ashpër sot testin raketor të Koresë së Veriut.
“NATO-ja i kërkon Phenianit të heqë dorë menjëherë nga aktiviteti bërthamor dhe nga lëshimi i raketave balistike në mënyrë përfundimtare, të verifikueshme dhe të pakthyeshme. Koreja e Veriut duhet të përfshihet në negociata ndërkombëtare dhe të mënjanojë çdo lloj provokimi”, deklaroi Stoltenberg.
Koreja e Veriut lëshoi dy raketa balistike nga brigjet verilindore, sot në mëngjes, në drejtim të Japonisë, sipas Shtabit të Përgjithshëm të Koresë së Jugut.
Ky test pason atë të mesit të korrikut, kur tre raketa u lëshuan në një distancë 500-600 kilometra para se të binin në Detin e Japonisë.
Për momentin nuk ka pasur asnjë dëmtim në territorin japonez, ndërkohë që është mbledhur një task forcë për të zhvilluar analiza më të thelluara.
