Nuk kanë të sosur problemet për naftëtarët e Ballshit. Rreth 1 mijë punonjës të uzinës së naftës janë hedhur sërish në protesta. Ata nuk kanë marrë ende pagat e muajit nëntor ndërkohë siç shprehen disa prej tyre, drejtuesit e kompanisë u kanë thënë “se nuk kanë para”.
Kjo gjendje sias tyre është krijuar pas ndërprejes së punës 2 javë më parë pas një avarie të krijuar në repartin e Koksit ku u plagos një punonjës. Po ashtu, raportohet se kompania nuk ka lëndë të parë për të vijuar punën në uzinë.
Punonjësit kërkojnë ndërhyrjen e shtetit për të furnizuar me lendë të parë uzinën për fillimin e punës sipas premtimit të kryeministrit Rama që nafta shqiptare të përpunohet në uzinën e Ballshit.
“I kërkojmë shtetit të marrë masa. Do të përshkallëzojmë protestat nëse nuk merren masa. Po kështu, nëse nuk na japin pagesën do t’i vëmë flakën uzinës”, thonë protestuesit, sipas Kamber Iljazit, kryetari i sindikatës.
Ndërkohë punonjësit vijojnë betejën ligjore për pagat e prapambetura. Ata kanë së paku pagat e 1 viti të pashlyera që nga periudha kur puna në uzinë u bllokua pas problemeve financiare dhe borxheve të shumta të pronarëve të vjetër.
Një prej premtimeve nga qeveria ishte shlyerja e plotë e pagave kur uzina i kaloi kompanisë që e ka aktualisht në zotërim. Por ende nuk janë shlyer këto detyrime. Madje, shpesh herë punonjësit janë ankuar për vonesa të shumta të pagave edhe në vijim, siç është edhe rasti më i fundit që i ka detyruar ata të hidhen në protestë.
/a.m.
