Pavarësisht fillimit të sezonit turistik dhe shifrave të ulëta të të infektuarve me COVID në vendin tonë, kufijtë me Greqinë vijojnë të qëndrojnë të mbyllura.
Komuniteti i emigrantëve shqiptarë në Greqi, ka njoftuar zhvillimin e një proteste ditën e nesërme në sheshin Sintagma në Athinë.
Ky organizim vjen pas vendimit të autoriteteve greke për të mbajtur mbyllur kufijtë me Shqipërinë deri më 14 qershor për shkak të koronavirusit.
“Komuniteti Shqiptar në protestë për hapjen e kufijve. Të gjithë nesër në orën 18:00 në Sheshin Sintagma. Hapni kufijtë si gjithë të tjerët ! Na lejoni të shkojmë në Atdheun tone” – thuhet në njoftimin e komunitetit.
Më shumë se një muaj më parë, autoritetet greke njoftuan se më datë 13 maj do të hapeshin kufijtë mes Shqipërisë dhe Greqisë. Por për shkak të situatës së koronavirusit, një vendim i tillë nuk është marrë ende.
Aktualisht drejt Greqisë udhëtojnë vetëm punonjësit sezonalë nga ora 08:00 – 16:00, qytetarët me dokumente greke apo leje qëndrimi të cilët duhet të paraqesin një test negative të koronavirusit. Kuota ditore e pranimit vijon të jetë 400 persona, ndërkohë që nuk lejohet kalimi I asnjë kategorie tjetër udhëtarësh.
Ndërsa dalja nga Greqia dhe hyrja drejt vendit tonë, do të jetë e lejuar nga ora 06:00 deri në orën 22:00, për të gjithë shtetasit dhe kategoritë e mjeteve. Për herë të parë nga marsi i 2020 hapet dogana e QafëBotës me kapacitet deri në 250 persona në ditë.
/b.h
