Vëllai i personit që u mbajt peng për gjashtë ditë në një stan në Plan të Dukagjinit, ka deklaruar para policisë se pengmarrësit e kishin kërcënuar se do t’i vrisnin vëllain nëse nuk do të paguante borxhin. Policia ka bërë të ditur se ngjarja ka ndodhur më 21 nëntor dhe tashmë ka nisur procedimi për shtatë shtetas. Në momentin e ngjarjes, personatr e proceduar kanë marrë peng shtetasin me iniciale S.K., bashkë me vëllain A.K., por ky i fundit është liruar për të gjetur e sjellë paratë, 10 mijë euro.
A.K. ka qenë ai që bëri denoncimin në polici. Në deklaratën e tij, vëllai i pengut, është shprehur.
“Më datë 21 nëntor, rreth orës 18:30, kam qenë duke pirë kafe me vëllain në një lokal në vendin e quajtur Rus, në qytetin e Shkodrës dhe aty erdhi Tomi (Tomë Shkrepa) dhe dy persona të tjerë, të cilët na hipën në një makinë tip ‘Benz-Mercedes’ dhe na çuan në fshatin Grudë e Re”.
Sipas burimeve të prokurorisë, bëhet me dije se sapo autorët kanë mbërritur në këtë fshat, kanë zbritur dy vëllezërit nga automjeti dhe njëri prej tyre kishte filluar duke i sharë, ofenduar, si dhe i kishte goditur me grushte duke u thënë: “Ju ose do më jepni 10 mijë euro, ose do më gjeni shtetasin x (blerësi i kanabisit), nga Mali i Zi”.
Më pas, mësohet se autorët i kanë hipur dy vëllezërit në një makinë tip fuoristradë Range Rover me ngjyrë jeshile dhe i kanë çuar në një përrua në fshatin Rrash-Kullaj, në Malësinë e Madhe.
Pasi i kanë rrahur, u kanë marrë telefonat, kanë lënë makinën dhe pas rreth tri orësh udhëtim në këmbë kanë shkuar në një fshat në zonën e Dukagjinit, ku përpara u kanë dalë dy persona të armatosur, të cilët kanë marrë me vete vetëm S.K., ndërsa Tom Shkrepa dhe një person tjetër janë kthyer së bashku me A.K. në Shkodër.
Sipas këtij të fundit, ai u la i lirë për të siguruar shumën e parave që pengmarrësit u kërkonin, shumë e cila duhej të dorëzohej deri më datë 29 nëntor ose në të kundërt do t’i vrasnin vëllain e mbajtur peng.
Pas denoncimit të A.K., 40 forca policore së bashku me efektivë të FNSH-së Shkodër, më 27 nëntor zhvilluan një operacion për lirimin e S.K. dhe vënien në pranga të autorëve. Operacioni i koduar “Pengu” u zhvillua në një terren të thyer e me dëborë dhe zgjati rreth 6 orë. Sapo uniformat blu i janë afruar stanit, pengmarrësit kanë qëlluar me automatik në drejtim të tyre.
Policia pshtë përgjigjur, ndërsa keqbërësit kanë tentuar të largohen prej andej të ndarë në dy grupe, ndërsa kanë lënë të lirë pengun.
FNSH ka ndjekur një prej grupeve dhe arrestuai Kolë Dushkun, Lek dhe Tomë Shkrepën, si dhe shpallën në kërkim katër bashkëpunëtorët e tyre. Sipas burimeve, bëhet me dije se pengmarrësit ishin kultivues të lëndës narkotike, ndërsa dy vëllezërit ishin ndërmjetësit e shitjes së drogës te një grup tjetër personash.
Këta të fundit nuk kishin bërë pagesën e drogës, ndërsa pengmarrësit shumën e lekëve ua kërkonin dy vëllezërve.
BW
