Nga Ben Andoni
Tani që zgjedhjet lokale mbaruan dhe thjesht po numërohen kutitë e fundit, një gjë është fare mirë e qartë për të gjithë, se shqiptarët edhe në këto votime, shkuan më shumë të varur nga politika dhe aspak me mëndjen te njerëzit, që do u menaxhojnë qytetin. Një gjykim që del prej kësaj që themi është se shumë njerëz që donin të kandidonin si të pavarur, e kishin të humbur që në fillim betejën e tyre para tre formacioneve kryesore politike, që mund të marrin gjithçka në vendin tonë, thjesht duke mobilizuar taborët e tyre të militantëve. Dhe, kjo e bën të shëmtuar justifikimin e politikanëve kryesorë të vendit për frymën në këto zgjedhje dhe se ata nuk kanë ndikuar asfare.
Megjithatë, është fillimi i procesit dhe tashmë për ata që kanë marrë detyrën mbetet thjesht të urohen e të mos paragjykohen para se të fillojnë dhe të tregojnë realisht se çfarë mund të bëjnë ndryshe. Vetëm se rizgjedhja e Dakos në Durrës, e Mziut në Kamëz, e Roshit në Kavajë etj., tregon se njerëzit në përgjithësi nuk e kanë atë lirinë e tyre, që pretendojnë, qoftë edhe në 2015. Mund të thuhen shumë gjëra tani pas zgjedhjeve dhe mund të flitet me shumë pathos për standartin e tyre, por standardi i vërtetë i zgjedhjeve është pikërisht fryma që i bën njerëzit të jenë të lirë në zgjedhje. Është turp të thuhet por edhe në vitin 2015 njerëzve iu bë presion në punë për të votuar, ashtu si shumë syresh e kishin detyrim të sillnin konfirmimin edhe të votave të familjes për të justifikuar punën. Me një fjalë, shumë ishin të detyruar për ata që do na drejtojnë dhe që në fakt duhet të robtohen për hallet tona.
Me pak fjalë, historitë e zgjedhjeve të fundit lokale na kanë mësuar se shumica e të zgjedhurve ishin thjesht figura politike, që bënë pak ose aspak për qytetet e tyre dhe kur u duhej të mbaronin një punë që e kishin si detyrim, merrnin të gjithë mediat të na e tregonin. Urojmë që ky grup i ri të tregojë se do e ketë ‘armike’ median dhe se janë punëtorë dhe jo-politikanë.
