Gjykata e Apelit ka shtyrë për në datën 18 prill dhënien e vendimit për kryebashkiakun e Kamzës Xhelal Mziu. Shkak për shtyrjen e seancës është bërë mungesa e të pandehurit.
Avokati i tij Genc Gjokutaj tha se klienti i tij nuk kishte dijeni për zhvillimin e seancës ndaj nuk ka qenë i pranishëm.
Mziu është dënuar nga Gjykata e Shkallës së Parë me 2 vite burg për akuzat për “shpërdorim detyre” dhe “shkelje të barazisë në tendera”.
Edhe pse ai ishte dënuar nga gjykata, Mziu rikandidoi dhe fitoi sërish zgjedhjet për Bashkinë e Kamzës. Nëse Apeli lë në fuqi vendimi ne shkallës së parë, atëherë Mziu do të ndërpresë mandatin dhe do të izolohet në qeli. Ndërkohë, në Kamëz do t’i hapej rruga zgjedhjeve të reja.
