Së fundmi problemi i hapjes së dosjeve ka marrë rrugë ligjore dhe është vënë në vijë, por sigurisht që emrat e njohur publikë janë sërish ata që marrin vëmendjen më të madhe.
Jo vetëm shkrimtarët, por edhe më gjerë do duhej në fakt të pastronin të shkuarën e tyre. Minimumi për të qenë të besueshëm publikisht. Kreu i Akademisë së Shkencave, Myzafer Korkuti i kontaktuar nga Tiranapost.al në lidhje me debatin që shfaqet herë pas herë në media për çështjen e dosjeve, shprehet:
“Unë i kam lexuar vazhdimisht në media që përfliten edhe akademikë që kanë lënë gjurmë në ato dosje”, thotë Korkuti.
“Është me shumë vlerë që ata të vetëdeklarohen, siç bëri Fatos Kongoli për shembull. Duhet ta bëjnë të gjithë. Duhet të shkojnë vetë qytetarët e sidomos ata që i përkasin notës akademike dhe sot kanë një rol në jetën publike. Duhet të vetëdeklarohen. Kanë kaluar 30 vjet dhe më duket jo vetëm normale, por me shumë vlerë që akademikët të mos jetojnë në ankth por ta bëjmë vetëdeklarimin”.
Çështja e së shkuarës së akademikëve në raport me Sigurimin e Shtetit bëhet më e ndjeshme kur disa akademikë përfshihen në debatet politike të ditës dhe vetëmbrohen, duke thënë se po shantazhohen si njerëz me probleme nga e shkuara, sidomos akademikë që kanë mundur të shkojnë në Perëndim gjatë komunizmit. (Tiranapost.al)
ma.me
