Kryeministri i Republikës së Kosovës, Isa Mustafa, tha sot se zgjedhja e presidentit Hashim Thaçi dëshmon stabilitetin dhe funksionalitetin e plotë institucional e demokratik të shtetit të Kosovës.
Në emër të Qeverisë së Kosovës, kryeministri Mustafa uron presidentin e ri, Hashim Thaçi, për zgjedhjen dhe dhënien e betimit para deputetëve.
Në një njoftim për shtyp të kryeministrisë thuhet se “Mustafa i uron presidentit Thaçi suksese në këtë detyrë, duke shprehur përkushtimin e Qeverisë së Kosovës për bashkëpunim në realizimin e synimeve të qytetarëve të Kosovës për zhvillim ekonomik, fuqizim të gjithanshëm të shtetit dhe integrime euroatlantike”.
Mustafa thekson se zgjedhja e presidentit të ri të Kosovës nga ana e përfaqësuesve të popullit të Kosovës në Kuvend, është një hap i rëndësishëm që dëshmon stabilitetin dhe funksionalitetin e plotë institucional e demokratik të shtetit të Kosovës.
Qeveria e Republikës së Kosovës fton të gjithë përfaqësuesit dhe subjektet politike në Kosovë, që në partneritet me SHBA-të dhe vendet tjera mike, të jenë pjesë e angazhimeve të përbashkëta për realizimin e aspiratave të qytetarëve të Kosovës./KosovaPress
