Kryeministri i Kosovës, Isa Mustafa, gjatë vizitës në Istog, shpalosi qëndrimet e tij lidhur me zhvillimet në vend dhe protestën e opozitës në Prishtinë.
Mustafa iu përgjigj edhe kërkesave të opozitës për dorëheqje të Qeverisë, duke thënë se ai do ta çoj mandatin e tij deri në fund, deri në vitin 2018. “Sot në Prishtinë duhej të kremtohej për fitoret shumë të mëdha që ka arritur Kosova gjatë këtij muaji, duke përfshirë rekomandimin për liberalizimin e vizave, anëtarësimin në UEFA dhe FIFA dhe proceset e tjera”, tha ai.
“Është hera e parë pas gjithë kësaj pritje që ne u barazuam me qytetarët e tjerë evropianë dhe duhet të përjetohet si sukses i të gjithëve, jo vetëm i pozitës por i të gjithë qytetarëve të Kosovës. Po ashtu të kremtojnë edhe anëtarësimin tonë në UEFA dhe në FIFA sepse janë organizatat më të mëdha botërore të futbollit. Ne do të jemi qytetarë të barabartë dhe pjesëmarrës të barabartë me të gjithë”, tha kryeministri.
Por, siç u shpreh ai, protesta është çështje legale, është e garantuar me Kushtetutë, është shprehje e mendimit të njerëzve, të qytetarëve dhe opozitës.
“Çështja e Asociacionit është rregulluar dhe përkufizuar shumë qartë me vendimin e Gjykatës Kushtetuese dhe ajo do të bëhet ashtu si Gjykata Kushtetuese ka vendosur dhe çështja e Demarkacionit për të cilën edhe komisioni ynë shtetëror, edhe komisioni i ekspertëve ndërkombëtarë, edhe Departamenti i Shteteve të Bashkuara të Amerikës, e kanë vërtetuar se është aty ku ka qenë përpara vija administrative ndërmjet Kosovës dhe Malit të Zi. Tani ne s’po vëmë kufij të ri, vetëm po rishënohet kufiri i cili ka qenë. Në qoftë se, eventualisht vërehet se është bërë ndonjë gabim edhe pala malazeze por edhe marrëveshja e parashikon që gabimet të rregullohen me pajtimin e dy qeverive, kështu që s’do të ketë asnjë problem”, tha kryeministri.
Sa i përket kërkesës për dorëheqje të Qeverisë, kryeministri Isa Mustafa ka thënë Qeveria do ta çoj mandatin deri në qershor të vitit 2018, sepse është një Qeveri e cila po tregon suksese shumë të mëdha në proceset e integrimeve euroatlantike, të thellimit të miqësisë me SHBA-të, të reformave strukturore e ekonomike. (javanews.al / r.a)
