Kryeministri Isa Mustafa ka shkruar në llogarinë e tij në Facebook në lidhje me veprimet e qeveritarëve dhe zyrtarëve tjerë serbë. Ai ka thënë se do t’i lejojë qytetarët serbë të Kosovës të votojnë për zgjedhjet në Serbi, por e di që këta serbë do të drejtohen nga politikanët serbë se duhet të kërkojnë zgjidhje te autoritetet kosovare.
Ai ka thënë se ka një intensifikim të skemave të retorikës nacionaliste të Serbisë përball Kosovës, dhe kjo retorikë, sipas Mustafës, është boshe, transmeton Koha.net. Kosova,sipas tij, nuk ka qenë kurrë pjesë e Serbisë dhe nuk do të jetë.
“Këto ditë kemi qenë dëshmitarë të intensifikimit të skemave të retorikës nacionaliste të Serbisë karshi Kosovës. Asgjë e re. Për fatin e tyre të keq, thjeshtë dhe vetëm retorikë boshe. Sepse, Kosova, kurrë nuk ka qenë dhe kurrë nuk do të jetë e Serbisë.
Ajo është e qytetarëve të saj të lirë, të pavarur e sovranë. Që fatin e tyre e kanë lidhur me vlerat evropiane perëndimore. Vlera që nuk pranojnë hegjemoninë. Por, vlera që promovojnë diversitetin”, është shprehuar kryeministri i Kosovës.
E gjitha kjo nga Mustafa po shihet si rezultat i zgjedhjeve në Serbi.
“Dallga e retorikës serbe karshi Kosovës do të kalojë. Qytetarët kosovarë të përkatësisë etnike serbe do ta kuptojnë se qëllimi i vërtetë i asaj retorike është gara e politikanëve të Serbisë për të përfituar sa më shumë vota prej tyre.
E kur t’i marrin votat e tyre, ata do të detyrohen t’u thonë serbëve kosovarë se zgjidhjet për problemet e tyre duhet t’i kërkojnë në Prishtinë. Sepse ky do të jetë epilogu. Edhe i dialogut të Brukselit. Edhe i dialogut për përafrimin e Kosovës, por edhe Serbisë në Bashkimin Evropian”, shkruan më tej Mustafa.
Ai ka thënë se drejton një qeveri demokratike të një vendi demokratik dhe si rezultat i kësaj nuk do t’i pengojë qytetarët e saj që të shprehin vullnetin e tyre, edhe në votimin për zgjedhjet në Serbi.
