Kryeministri Isa Mustafa ka aluduar se ekspertët e Shteteve të Bashkuara të Amerikës i dinë më mirë kufijtë e Ballkanit sesa që vijat kufitare paraqiten në hartat e ekspertëve vendorë.
Mustafa në profilin e tij në Facebook, shkruan se ekspertët e vendit nuk i dinë se ku i kanë as “megjat” e veta e lëre më të shtetit, referon Zëri.
“Logjika e Këshillit të Përgjithshëm të LDK-së sot ishte se më të sakta janë hartat që i ka Departamenti i Shtetit i Shteteve të Bashkuara të Amerikës për kufijtë e vendeve të Ballkanit, pra ata që intervenuan ushtarakisht në Kosovë, sesa hartat e do ekspertëve tanë (që as megjat e tokave të veta nuk i kanë vënë e lere më të kenë përcaktuar një kufi shtetëror- vërejtja ime) e që po e kundërshtojnë demarkacionin me Malin e Zi”, shkruan Mustafa.
Në fund ai shprehet se Lidhja Demokratike e Kosovës ka besim të plotë në konstatimet që Amerika dhe vendet e Bashkimit Europian kanë dhënë për demarkacionin. (b.an)
