Kryeministri i Kosovës, Isa Mustafa, deklaroi sot se duhet të tregohemi të gatshëm për t’i përmbushur detyrimet ndërkombëtare dhe në asnjë mënyrë mos të paragjykohet lufta e pastër e UÇK-së, raporton Kosovapress.
Gjatë fjalës së tij në akademinë përkujtimore kushtuar luftëtarëve të lirisë, të rënë në betejën e lavdishme të Loxhës, Mustafa tha se “këta miq na inkurajojnë që të zbardhim vrasjet e pretenduara. Kosova është e aftë të ndërtojë shtet të së drejtës dhe veç kërkesës për të zbardhur vrasjet e pretenduara gjatë luftës, ne duhet të zgjedhim të gjitha vrasjet politike të pasluftës, në mënyrë që Kosova të lirohet nga kjo barrë”, ka thënë Mustafa.
Sipas tij, beteja e Loxhës shquhet për organizim ushtarak dhe bashkëpunim me banorët e kësaj zone.
