Kryeministri i Kosovës, Isa Mustafa deklaroi se janë duke biseduar me partnerët e koalicionit qeverisës dhe në momentin që sigurohen se i kanë votat, do ta procedojnë në Kuvend për ratifikim, marrëveshjen për demarkacionin mes Kosovës e Malit të Zi.
Kreu i ekzekutivit theksoi se edhe në Bruksel i është bërë e qartë se ka mbetur vetëm ky kriter pa u plotësuar në mënyrë që të ndodh liberalizimi i vizave edhe për qytetarët e Kosovës.
“Ne po bisedojmë me partnerët e koalicionit, jo vetëm me PDK-në por edhe me subjektet e tjera, duhet të takohemi edhe me Listën Serbe dhe të shohim se si janë gjasat e prezencës së tyre në Kuvend dhe të votimit. Do të thotë se ne do të procedojmë në Kuvend në momentin që e kemi të sigurt që do ta votojmë, sepse natyrisht që nuk ka asnjë arsye që të shkojmë në Kuvend pa rezultat. Për ne është me rëndësi të madhe të ratifikohet dhe të bëhet liberalizimi për qytetarët”, tha Mustafa.
Mustafa shtoi se nëse gjejnë ndonjë mundësi do të lënë ndonjë proces të hapur dhe të rishqyrtojnë ndonjëherë më vonë atë vijë kufitare, për shkak të disa vërejtjeve që janë dhënë, por se sipas tij, aktualisht me rëndësi themelore është që të ratifikohet marrëveshja dhe të liberalizohen vizat.
Madje, Mustafa thotë se herën e fundit që ishte në Bruksel kërkoi nga krerët e Bashkimit Evropian që ta pezullojnë për dy vite ratifikimin e marrëveshjes për demarkacionin dhe t’iu jepet liberalizimi i vizave qytetarëve, por se një gjë e tillë është e pamundur, pasi kërkon pëlqimin e secili shtet veç e veç./KosovaPress/b.d
