Asnjë gjurmë ketamine, kokaine, fentanyli, opioidesh apo kanabinoidesh. Elon Musk ka rezultuar negativ në testin e drogës, duke hedhur poshtë akuzat për përdorim të substancave narkotike. Kreu i kompanive Tesla dhe SpaceX publikoi vetë në rrjetin X (ish-Twitter) rezultatin e analizave të urinës të kryera më 11 qershor në një laborator në Illinois.
Në dokumentin e shpërndarë, të gjitha 24 substancat e kontrolluara rezultonin “negative”. Me këtë lëvizje, Musk synon të përgënjeshtrojë zërat që qarkulluan në media lidhur me një varësi të tij ndaj ketaminës. Për më tepër, u kundërpërgjigj duke sfiduar vetë gazetat që e akuzuan.
“Tani është radha e New York Times dhe Wall Street Journal të bëjnë testin e drogës dhe t’i publikojnë rezultatet”, shkruhej në një postim të bërë nga llogaria “Doge Designer”, pas së cilës dyshohet se qëndron vetë Musk, postim që ai e ndau në profilin e tij.
Akuzat ndaj Musk u publikuan gjatë mbështetjes së tij për Donald Trump në kuadër të fushatës zgjedhore. Mediat si New York Times raportuan se miliarderi ishte shpesh nën efektin e ketaminës dhe substancave të tjera, duke përmendur edhe probleme fizike si pasojë e përdorimit të vazhdueshëm.
Në artikujt e publikuar pretendohej gjithashtu se Musk konsumonte rregullisht edhe ilaçe të tjerë si Adderall, stimulues që përdoret për trajtimin e çrregullimit të vëmendjes (ADHD) dhe narkolepsisë. Sipas këtyre raportimeve, përdorimi i barnave i kishte dhënë energjinë për të marrë pjesë në disa aktivitete në një ditë dhe për të bërë postime të shumta gjatë natës.
New York Times aludonte gjithashtu se sjelljet e çuditshme të Musk gjatë një konvente republikane në shkurt, përfshirë një fjalim të paqartë dhe daljen në skenë me barkun e zbuluar, ishin pasojë e gjendjes së tij. Por Musk i hodhi poshtë të gjitha këto gjatë konferencës së tij të fundit për shtyp në Shtëpinë e Bardhë.
