INTERVISTA/ Deputeti i PS-së analizon protestën e opozitës. “Ka shumë konfuzion, pasi kërkesat ndryshojnë çdo ditë”. Ai i rekomandon PD-së, të ndjekë rrugën institucionale, atë të parlamentit
Protesta e PD-së ka hyrë në ditën e saj të shtatë. PD-ja organizoi në çadrën e ngritur para kryeministrisë një parlament të improvizuar dje, ku folën disa deputetë. Si gjithmonë, kur flitet për parlamentin, edhe pse të improvizuar, Berisha foli më shumë nga të gjithë. PD-ja është e vendosur të qëndrojë në protestë, deri në arritjen e qëllimit final, për krijimin e një qeverie teknike për të garantuar zgjedhjet e 18 qershorit. Dhe bojkoti i parlamentit u verifikua edhe në seancën e sotme. Nga ana tjetër, qëndrimi i mazhorancës është krejt ndryshe: Respektimin e institucioneve për zgjidhjen e ngërçit. Mazhoranca vijon të bëjë thirrje për kthimin e opozitës në parlament.
Biseda me një nga figurat më të vjetra në Partinë Socialiste, kishte si qëllim, pikërisht, të analizonte situatën politike dhe pozicionet ku janë mbërthyer palët.
Z. Ulqini, protesta e PD hyri në ditën e saj të 7. Cili është mendimi juaj për këtë protestë?
Unë vlerësoj dhe respektoj protestuesit, por ndiej keqardhje të madhe për keqpërdorimin e saj nga drejtuesit, organizuesit. Jam dakord me çdo protestë, por në këtë rast, tjetër qëllim kanë drejtuesit e demonstratës dhe tjetër demonstruesit e thjeshtë. Pra, qëllimi i organizuesve është krejt tjetër. Unë kam respekt të madh për ata që protestojnë, është një e drejtë kushtetuese, një e drejtë legjitime, pasi, ndoshta, disa njerëz janë të pakënaqur me qeverinë me të drejtë apo me të padrejtë, për shkak të reformave (reformat janë më se të domosdoshme dhe kërkesa të kohës) , apo për arsye të tjera. Pra, protesta është diçka legjitime në një vend demokratik, siç jemi ne. Personalisht kam shumë respekt për të gjithë protestuesit, pasi ata e ndihmojnë qeverinë për të realizuar objektivat e marra, të mbajë shënim gjërat që tu përgjigjet atyre dhe, nga ana tjetër, protestat i japin energji opozitës. Por, kërkesa e opozitës për të fituar qeverinë në tryezë (e shmangin thelbin e protestës), pastaj për qeveri teknike, pastaj braktisja e parlamentit, etj., më duken pa objekt, pa strategji… Thonë të miratojmë Komisionin e Vettingut, por pasi të përjashtojnë 7 ligjet që janë miratuar. Pra, kundërshtojnë vetveten.
Faktori ndërkombëtar Raportuesi për Shqipërinë, Fleckenstein si dhe komisionari Hahn, deklaruan se janë kundër bojkotit të Parlamentit. Pra, duan që kërkesat e PD-së të zgjidhen në parlament?
Këtë e thonë dhe drejtuesit e pozitës, Rama dhe Meta që problemet që shtrojnë drejtuesit e PD-së ti sjellin në parlament, të bëhen nëpërmjet dialogut, të bëhen nëpërmjet bisedimeve, pra të adresohen në institucione. Në parlament ka një komision zgjedhjesh ku të gjitha këto probleme të diskutohen dhe të arrihet zgjidhja. Kërkesat që kanë duhet të zgjidhen në mënyrë institucionale dhe në bazë të kërkesave dhe normave që ka ODHIR. Ky organizëm njihet ndërkombëtarisht si organizmi më i specializuar i zgjedhjeve, si arbitri i zgjedhjeve. Opozita nuk vjen në parlament, ata nuk vijnë në Komisionin e Reformës zgjedhore dhe janë konfuzë, pasi i ndryshojnë çdo ditë kërkesat e tyre. Pra, kjo protestë ka shumë konfuzione, ku dhe ata vetë nuk dinë çfarë bëjnë…
Cila është një ndër konfuzionet kryesore të protestës?
Së pari, zgjedhjet nuk janë zhvilluar. Pra, ata paragjykojnë zgjedhjet dhe protestojnë për diçka që nuk ka ndodhur. PS-ja bëri një protestë të ngjashme në vitin 2010, por e zhvilloi për diçka që kishte ndodhur, pavarësisht se sa të drejta dhe të padrejta ishin. Pra, ne në protestë mblodhëm njerëzit tanë për atë çka kishte ndodhur. Këta protestojnë për diçka që nuk ka ardhur ende, nuk ka ndodhur dhe nuk është bërë.
Është normale që në këtë logjikë, të kërkohet qeveri teknike?
Në vendin tonë, që tashmë është një vend demokratik, kjo gjë është kërkuar para 25 viteve. Pra, na kërkohet të kthehemi 25 vjet prapa. Pse? Atëherë kërkohej qeveria teknike, sepse nuk ishin ngritur ende institucionet kushtetuese, nuk kishte një Kod Zgjedhor të përcaktuar qartë. Sot, pas 25 viteve kemi një Kod Zgjedhor sipas standardeve më të mira i miratuar nga ODHIR-i, që është arbitri ndërkombëtar i zgjedhjeve. E para kjo, së dyti, kemi instrumentet, institucionet e ngritura zgjedhore në zbatim të Kodit Zgjedhor siç janë komisionet e nivelit të parë dhe të dytë, KZAZ-të dhe KQZ-të. Në këto komisione, si opozita ashtu dhe qeveria janë të përfaqësuara në mënyrë të barabartë në administratën e zgjedhjeve, në të tre nivelet dhe kanë kompetenca të njëjta për ta menaxhuar apo për ta bërë procesin zgjedhor të saktë.
Pra, në këto kushte kërkesa për qeveri teknike nuk ka asnjë lloj mbështetje ligjore?
Aspak. Të kërkosh zgjedhje të parakohshme, në këto kushte, është njësoj sikur të kthehesh 25 vjet pas. Kështu funksionojnë zgjedhjet në të gjithë botën. Pra, në këto 25 vjet pasi u ngritën këto institucione në bazë të kërkesave të ODHIR-it dhe ndihmës së saj, mbi këto baza janë zhvilluar zgjedhjet. E fundit, ka një Komision Parlamentar që është ngritur për Reformën Zgjedhore, ku mazhoranca ka kaq kohë që i lutet, i bën thirrje opozitës që të marrë pjesë, se është Institucion parlamentar, ku të gjitha kërkesat duhet të jenë të ballafaquara me paketën e ODHIR-it. Edhe kryeministri Edi Rama, ka deklaruar publikisht se “çfarëdo projekti për zgjedhjet ne e mbështesim nëse do të merret miratimi i ODHIR-it dhe i OSBE-së”. Pra, për të gjitha kërkesat, votim elektronik, për numërim elektronik, për gjithçka që kërkon opozita dhe miratohet nga ODHIR-i dhe OSBE-ja, ne jemi gati që ta firmosim. Arbitri për ne është ODHIR-i, dhe jo vetëm për ne, por për të gjithë zgjedhjet kudo në botë. Ne do të ndjekim me përpikëri çdo orientim dhe udhëzim të tyre.
Free Press
