Motër Mariana është murgesha shqiptare e cila ishte njëra nga të mbijetuarat e tërmetit të tmerrshëm që goditi dje Italinë Qendrore.
Në një rrëfim për mediat italiane, pas tragjedisë, ajo ka treguar edhe më shumë detaje se si arriti të dilte e gjallë nga rrënojat e tërmetit.
Është e tronditur, fytyra e saj është e mbuluar nga gjaku, si rezultat i një plage që ia kanë qepur në kokë. Në duar mban një kuti me biskota dhe pak ujë. Është duke qarë, e paaftë për të kuptuar se çfarë ka ndodhur. Kështu e përshkruan gjendjen emocionale të murgeshës shqiptare il.tempo.it.
Ajo tregon se si zhurma e ka zgjuar. “Unë kam qenë në katin e fundit, në të tretën. U përpoqa të dal nga dhoma, pastaj u ktheva përsëri në shtëpi. U fsheha nën krevat dhe dëgjova zërin e një djali i cili kishte dëgjuar britmat e mia për ndihmë. Ai më shpëtoi”.
“Jeta ime ishte e rrezikuar po të mos më shpëtonte. Ai bëri një akt heroik dhe Zoti do ta shpërblejë për këtë”, tha 32 vjeçarja, e cila ishte në manastirin e saj “Don Minozzi” me pushime, shkruan Panorama.
“Kur e kuptova se ishte tërmet dhe pashë se gjithçka ishte në kolaps, fillova të trishtohesha. Instinkti i parë ishte të dilja jashtë, në oborrin e manastirit, por skena ishte apokaliptike. Nuk kishte asnjë kalimtar që t’i kërkoje ndihmë. U ktheva në dhomë për t’u veshur, sepse ndjeja ftohtë. Pashë dollapin të shembur, gërmova mes mbeturinave per te gjetur celularin dhe mora rrobat. Por godina vazhdonte të shkërmoqej, ne kete kohe u fsheha nën krevat”, vijon ajo.
Tri murgesha të tjera u shpëtuan nga ekipet e shpëtimit, ndërsa kërkimet po zhvillohen për tri motra dhe katër të ftuar të tjerë, të cilët janë zhdukur pas tërmetit.
Motra Marianna, me origjinë shqiptare dhe rezidente në Romë, kishte shkuar në Itali një muaj më parë për të ndihmuar motrat në manastir dhe për t’i ofruar kujdes mjekësor të moshuarve.
