Fatjon Murati nuk e theu masën e arrestit shtëpiak të vendosur nga Gjykata e Tiranës vetëm ditën para sulmit mbi lokal. Klan News ka mësuar se në raportin e ngjarjes që Policia e Tiranës i ka kaluar Prokurorisë ka një të dhënë tjetër. Aty thuhet se 32 vjeçari ka kaluar kufirin e Shqipërisë në datën 19 Janar të këtij viti. Madje duke e vulosur pasaportën e tij. Ky fakt është konfirmuar nga sistemi TIMS.
Nuk ka një të dhënë të dytë se kur ai është rikthyer në Shqipëri. Por, besohet se ajo duhet të ketë ndodhur para datës kur oficeret e policisë bënin si zakonisht konfirmimin për zbatimin e masës së sigurisë.
Sakaq, në raport lexohet se në lokal në momentin e sulmit kanë qenë 9 persona duke përfshirë edhe mbesën 10 vjeçare të viktimës Mimoza Paja. Kjo e fundit në momentin e goditjes ka qenë në këmbë dhe ka marrë një plumb pas shpine në brinjë.
Sipas dëshmive të të pranishmëve në lokal, policia ka mësuar se vëllai i Fatjon Muratit, Ervisi ka qenë duke qëndruar në këmbë së bashku me kushëririn e tij duke ndjekur ndeshjen Juventus Sampdoria. Xhaxhai i tij i ulur në tavolinë me një nipin e tij dhe tre personat e tjerë në dy tavolina më tej.
Të gjithë dëshmitarët mohojnë të kenë parë autorët dhe theksojnë se kanë dëgjuar vetëm zhurmën e plumbave dhe janë përpjekur menjëherë t’u shpëtojnë atyre. Ervis Murati, shënjestra e mundshme e sulmit, ka deklaruar:
“Jam ngritur në këmbë pasi të shtënat kanë mbaruar dhe nuk kam kuptuar kush janë autorët. Mimoza ishte e rrëzuar në tokë e mbuluar me gjak dhe aty kam kuptuar se kishte ndërruar jetë. Kam hipur xhaxhain Shehatin në makinën e Ervinit dhe e kam dërguar në spitalin ushtarak pasi kishte një dëmtim pas koke dhe në shpatull. Pasi kam lënë xhaxhain në spital jam kthyer te vendi i ngjarjes, pra tek lokali dhe kam parë se kishte ardhur policia.”
Edhe të plagosurit e tjerë deklarojnë se kanë gjetur mjete të rastit për t’iu drejtuar Spitalit të Traumës. Nga verifikimi i të gjitha kamerave të sigurisë që përshkruajnë rrugën nga lokali deri në vendin ku u gjet automjeti i djegur i autorëve, hetuesit kanë arritur të zbulojne itinerarin e tyre.
Makina “BMW” është parë nga një kamera në rrugën e Rinasit duke ecur në drejtim të kryeqytetit dhe më tej pas 30 minutash është parë sërish në këtë pikë në kthim.
Nga verifikimet paraprake hetuesit kanë arritur në përfundimin se shkak për sulmin në lokalin në pronësi të vëllezërve, Fatjon, Ylli, dhe Ervis Murati është hakmarrja, në vazhdën e ngjarjeve të tjera kriminale ku ka patur të dëmtuar dhe viktima, në qytetet si Tiranë, Lezhë, dhe Laç.
Ekspertët e krimeve gjatë dy ditëve kontroll në lokal kanë arritur të sekuestrojnë 23 gëzhoja që janë shtënë nga armët e agresorëve. Armët e zjarrit janë dërguar në laborator për të parë nëse ka gjurmë të autorëve që mund të ndihmojë policinë në identifikimin e tyre.
/a.r
