Gjykata e Posaçme u detyrua të shtyjë për të disatën herë nisjen e gjyqit ndaj Emiliano Shullazit, Lulzim Berishës dhe pesë të tjerëve të akuzuar për vrasjen e Klodian Saliut dhe Vajdin Lamajt në dy ngjarje të veçanta në vitin 2005. Shkak u bë mungesa e të pandehurit Luftar Reçi, i penduar i drejtësisë në proces, si edhe mosnjoftimi për gjyqin i Lulzim Berishës dhe Plaurent Dervishajt.
Mungesa e Reçit ngjalli revolte tek i pandehuri Viktor Imeraj.
“Pse nuk vjen Luftar Reçi? Kemi dy vjet që rrimë në burg prej tij, s’ka ardhur në asnjë seancë, të vetme. Ç’është ky muhabet? Le ta sjellë policia me forcë!”, tha Imeraj.
Për njoftimin e Berishës dhe Dervishajt Gjykata relatoi se përveç shpalljeve të fletëthirrjeve në gjykatë dhe pranë banesës dhe kërkimit të policisë, ka kërkuar edhe ndihmën e Interpol. Zyra e Interpol Tirana ka konfirmuar faktin se Berisha dhe Dervishaj janë të shpallur në kërkim ndërkombëtar për llogari të drejtësisë shqiptare. Për Lulzim Berishën Interpol nuk kishte asnjë informacion që të ishte ndaluar, apo arrestuar në ndonjë shtet të huaj. Në lidhje me Plaurent Dervishajn Interpol Tirana ka pohuar se i është drejtuar me shkresë Interpol Abu Dabit, por ende nuk kanë marrë informacion prej tyre.
Vrasja e Lamajt dhe Saliut, zbardhet dëshmia që “fundos” Berishën e Shullazin
Në 8 dhjetor të 2020, SPAK njoftoi zbardhjen dhe dokumentimin e plotë të 2 ngjarjeve kriminale në operacionin e koduar “Asgjë nuk harrohet”. Zbulimi i personave të përfshirë në këto dy ngjarje do të bëhej përmes një prej të akuzuarve, Luftar Reçit, i cili zbuloi emrat e personave që organizuan dhe ekzekutuan atentatet. Me statusin e bashkëpunëtorit të drejtësisë, Reçi, si i përfshirë në të dy ngjarjet, zbardhi dinamikën e vrasjeve që tronditën vendin në vitin 2005, si dhe përfshirjen në të të ish-kreut të Bandës së Durrësit, Lulzim Berisha, dhe ish-kunatit të tij Plarent Dervishaj, të cilët janë shpallur në kërkim.
Dy ngjarjet kriminale të zbardhura nga SPAK kanë ndodhur shkurtin e vitit 2005. Mbrëmjen e 26 shkurtit Klodian Saliu po udhëtonte në një automjet tip “Mercedes” në aksin Durrës-Maminas, kur nga një automjet në lëvizje u qëllua me breshëri automatike. Saliu u vra, ndërsa u plagos edhe një person tjetër. 24 orë me vonë, biznesmeni Vajdin Lamaj u vra nga një shpërthimi telekomanduar i një sasie tritoli të vendosur në ashensorin e pallatit të tij pranë stadiumit kombëtar, të quajtur asokohe “Qemal Stafa”. Përveç tij, i vrarë mbeti edhe Artan Arsi./m.j
