Mungoi sot në gjyq, ish-sekretari i PPSH: SPAK është si Sigurimi, Rama më i keq se Enveri

Gjykata e Posaçme e Shkallës së Parë për Korrupsionin dhe Krimin e Organizuar (GJKKO), zhvilloi sot seancën për caktimin e masës së sigurisë, mirëpo Sali Berisha zgjodhi që të mos jetë në sallë. Paralelisht ai mbajti një takim me të rinjtë e Forumit Rinor të Partisë Demokratike, ku ka hedhur akuza të forta në drejtim të SPAK. Duke e quajtur si “Skapi”, Berisha tha se ky Institucion i drejtësisë së re ngjason si dy pika uji me Sigurimin e djeshëm, madje theksoi se “Skapi është një organizatë e mirëfilltë kriminale”.

“Për të kuptuar ngjashmërinë mes diktaturës së sotme dhe diktaturës së djeshme, se ju jeni fatlumë, asnjëri prej jush nuk e jetoi atë diktaturë dhe është fat i madh. Por problemi është se sot jemi prapë në diktaturë dhe kjo kërkon vetëdijen tuaj të plotë. Përpara ne kishim Sigurimin e Shtetit, i cili fajësonte njerëz pa faj, me një qëllim të vetëm, që të ushtronte terror në shoqëri.

Sot kemi Skapin. Çfarë ishte Sigurimi? Sigurimi përbëhej nga kriminelë, nga torturues, nga vrasës, nga përdhunues. Përbëhej nga një vulg njerëzor ndaj dhe ata ishin të aftë të zbatonin çdo urdhër. Por çfarë është Skapi sot? Ngjason si dy pika uji me Sigurimin e djeshëm. Skapi sot është një organizatë e mirëfilltë kriminale që rëndom paraqitet si një risi. Po pse them se është organizatë kriminale?

Sepse aty janë rekrutuar prokurorë, përfaqësues të bandave më të rrezikshme të Shqipërisë. Aty është prokurori që u tha shqiptarëve se Mehmet Greca, trafikanti që kishte mbushur makinën me fletë votimi dhe euro dhe karta identiteti në Elbasan, nuk kishte asgjë në makinë. Dhe ai u shpërblye nga bosi i tij i krimit, Taulant Balla dhe u soll në Skap. Skapi është organizatë kriminale sepse vrasësi që vrau jashtë çdo lloj tradite njerëzore në gjumë të fejuarën e tij 15-vjecare, në vend që të dënohej me dënim përjetë, doli nga burgu sikur nuk ka kryer krim. Skapi tha: jo, këta nuk janë organizatë kriminale. E dërguan në Shkodër, ku shoku i tyre kishte marrë milionat dhe ata dolën të lirë.

Ose, ish-oficeri i Sigurimit të Shtetit, Arben Kraja qëndron në Skap. Ligji thotë nuk mund të jenë në prokurorinë e shtetit ata të cilët kanë qenë bashkëpunëtorë ose oficerë të Sigurimit të Shtetit. Por ligji nuk ekziston për ta, ekziston vetëm vullneti i Edi Ramës për t’i përdorur si mercenarë. Të njëjtën figurë kanë krijuar dhe po krijojnë te gjykatësit. Pra, Edi Rama ka vendosur një kontroll të plotë dhe total mbi të gjitha pushtetet”, tha Berisha.

Ndalur te kryeministri Edi Rama, Berisha tha se është më i keq se Enver Hoxha ose Hitleri.

“Arriti të mbyllë dhe dritaren e fundit të opozitës, e fundit kishte mbetur, në rrugë ligjore i kishte mbetur drejtimi në Gjykatën Kushtetuese. I hoqën pakicës të drejtën e pakushtëzuar vetëm e vetëm për të mbrojtur pushtetin e Edi Ramës, thanë jo, Kushtetuta nuk ua njeh këtyre 1/5 deputetëve të drejtën, po përse? Sepse parlamenti ka deputetët, ka stafet administrative ka organet drejtuese,  secili që do mund të shkojë të firmosë tek 1/5, u ndala në këtë aspekt, ajo që ndodhi në GJK ishte vdekja e ëmbël përfundimtare e sistemit demokratik, ajo që ndodhi, ata gjykatës firmosën mbylljen përfundimtare të të drejtës së opozitës për të mbrojtur interesin publik. As tek Enver Hoxha, as tek Hitelri, ata bënin ligje, por nuk silleshin me Kushtetutën në këtë mënyrë”, tha Sali Berisha që ka patur miqësi dhe ka album fotografik me të gjithë ish-udhëheqësit komunistë. Nga Hysni Kapo, tek Ramiz Alia e Enver Hoxha.

/a.r