Deputetja e PD-së Zheni Gjergji tha se pas publikimit të skandalit të onkologjikut ministrja e Shëndetësisë duhet të kishte dhënë dorëheqjen. Sipas saj gjendja e pacientit sot tek ky spital është e mjerueshme dhe pa medikamente, ndërsa ministrja nuk flet për ta, por bën propagandë.
“Mendova që do të kishte reflektim do t’i kishit kërkuar falje qytetarëve që përballen në spitalin onkologjik dhe në ndërgjegjen tuaj duhet të kishit dhënë dorëheqjen. Janë dhjetëra pacientë që tani rrinë në këmbë në korridor të errët, pa stola dhe kondicioner duke pritur të takohen me mjekun. Përveçse në moshë, por edhe në gjendje të rëndë mezi qëndrojnë. Pasi bëjnë konsultë me mjekun ata i drejtohen farmacisë së spitalit dhe në të shumtën e rasteve ata marrin përgjigjen: duhet të prisni ka radhë. Dhe ata zgjidhjen e gjejnë në farmacinë afër që kontrabandë fut disa ilaçe, apo te klinikat e spitalet private. Kjo është gjendja sot në Onkologjik. Unë kam edhe emrat e tyre, por për arsye etike nuk i bëj publike, se ata kanë frikë se mund të kenë pasoja nëse bëjnë kallëzime të hapura. Ju nuk folët për këtë zonja ministre”.
Sipas deputetes demokrate, politikat shëndetësore të kësaj qeverie nuk kanë përmirësuar trajtimin e sëmundjeve tumorale, ndërsa qeveria nuk mori masa as pas raporti të KLSH dhe gjetjeve të opozitës.
“Shëndetësia fals u mund nga kanceri. A kanë arritur politikat shëndetësore përmirësimin e trajtimiti të sëmundjeve tumorale? Përgjigjja është jo. Ju anatemuat opozitën se po përdor rastin politikisht. Justifikimi juaj për çdo gjë kriminale, kur duhet të kishit pranuar këto përgjegjësi. Ndërkohë si ju, kolegët e mazhorancës kanë ndaluar çdo iniciativë të drejtë për shqetësimet e ngritura nga KLSH. Koha na dha të drejtë, por humbëm shumë kohë, jetë e familjarë. Gjatë kësaj kohe shumë pacientë vijuan të mos merrnin shërbim. Mungesë ilaçesh, mungesë trajtimi në spitale. Këto janë gjetjet e KLSH. Në fjalën tuaj shqiptarët nuk gjetën asnjë përgjigje. Kjo çështje nuk është më administrative, por duhet të hetohet nga SPAK, pasi është kriminale tu mohosh të drejtën kushtetuese për shëndet e trajtim dinjitoz të qytetarëve shqiptarë. Të vendosë përgjegjësit para drejtësisë nga Edi Rama, drejtorët e ish-drejtorët”.
/a.r
