Ndërkohë që Bashkimi Evropian ka nevojë për 260 mijë mjekë të rinj, sipas statistikave, Italia po përballet me një mungesë të theksuar personeli të specializuar mjekësor. Në 6 vjetët e fundit stafi kombëtar i mjekëve është pakësuar me 16700 specialistë. Një ushtri e vërtetë mjekësh që ose kanë ikur nga sistemi mjekësor, ose janë larguar nga vendi për në vendet më të pasura evropiane, njofton Javanews.
Rasti emblematik mbetet rajoni i Molizes, ku janë thirrur sërish në detyrë mjekët e dalë në pension. Sipas statistikave zyrtare, ekipi kombëtar i mjekëve në Itali përbëhet në masën 68% nga doktorët me moshë mbi 50 vjeç.
Ndërkohë shtypi italian pohon se një listë problemesh në rritje për mjekët italianë janë kushtet e punës, paga dhe taksimi, por edhe konservatorizmi i një pjese të sistemit, që pengon futjen e të rinjve në spitalet dhe klinikat italiane, përfundon Javanews.
