Nga Spartak Ngjela
A mund t’i ndodhë Shqipërisë sërish fati i saj i keq, që një grup njerëzish ta izolojnë osmanisht nga Perëndimi? Jo. Kjo mundësi tani është zero, sepse antiperëndimorët nuk janë në pushtet.
I gjithë grupi Berisha që po lufton për “sarajet e Saliut” nuk di as vetë se çfarë kërkon. Saliu i ka inkriminuar dhe u ka lënë hapësirë të përvetësojnë diçka nga abuzimi. Por jo të gjithë ata flasin. Çudia është se kundër Amerikës dhe shqiptarëve shihen si “të palodhur” dy ose tre kukulla që nuk kanë lidhje shumë me abuzimin. Këta nuk kuptohet se përse dalin kundër historisë: janë të liq si natyrë, apo janë injorantë që i lodh historia? Më së shumti janë injorantë që nuk e njohin fare as historinë, as politikën dhe as gjendjen aktuale në Shqipëri.
Por, a kanë frikë nga drejtësia? Jo, sepse të tremburit që i ndruhen drejtësisë, nuk po flasin dhe, siç duket, nuk kanë më shpresë te vota parlamentare. Ai që bërtet me pafuqi fizike dhe i drobitur në fytyrë është Sali Berisha. Ndihmësit e tij duken si shërbëtorë të feudalit mesjetar, sepse nuk e kuptojnë që në Reformën shqiptare janë pleksur interesa historike të Perëndimit dhe të vetë shqiptarëve.
Shqipëria gjithmonë ka qenë një pikë kyçe në historinë moderne të Perëndimit, kurse sot është domosdoshmëri. Pas luftrave kastriotiane, gjithmonë shqiptarë kanë qenë ata që i kanë shitur shqiptarët në Lindje. Por kanë qenë shqiptarë në pushtet absolut. I fundit ka qenë Enver Hoxha, sepse këta të sotmit të Saliut, për fat të shqiptarëve, nuk janë në pushtet. Grupi i Saliut, për t’i shpëtuar kësaj Reforme, do t’i shiste shqiptarët në Lindje, po të ishte në pushtet, por sot ai është në trotuar. Këtë nuk kuptojnë dot lakejtë e Saliut, sepse nuk e njohin as historinë, dhe as politikën. Saliu vërtet është hedhur me të gjithë forcën kundër Amerikës, por nuk e ka ai në dorë drejtimin e politikës shtetërore, prandaj qeshin me të amerikanët.
Kur interesat janë të mëdha, edhe forcat kundërshtare të interesave shkatërrohen. Saliu dhe tabori i tij do shkatërrohet, se nuk është në pushtet. Po të ishte në pushtet, shkatërrimi do t’u vinte me lëvizje popullore; pa qenë në pushtet, shkatërrimi i tij vjen dhe me tre policë të shtetit. Nuk e patë që “revolucionin” antiperëndim kërkoi ta bënte Saliu? Idea ishte që me revolucion të merrte sërish pushtetin. Por ja që “nuk kishte shkëndi” për të ndezur zjarrin.
Sigurisht që kjo është tabloja qesharake e të papushtetshmit, prandaj qeshin amerikanët, se pushtetin e ka kryeministri aktual, dhe ai ka firmosur Reformën.
Po kryeministri aktual, e do realisht Reformën, dhe ështe realisht me interesin shqiptaro-amerikan të momentit? Sigurisht që po, se e di që nuk ka rrugë tjetër as për të, dhe as për kërkënd tjetër. Sot fati shqiptar ështe takuar me historinë e Perëndimit, dhe brenda këtij vektori ecën dhe kryeministri shqiptar dhe gjithë lidërshipi socialist. Kjo sigurisht që mjafton, sepse Saliu nuk e bëri dot revolucionin neoosman në Shqipëri.
Por, çfarë do behet me Reformën, a do të votohet ajo në Parlament, kur duhen 94 vota? Patjetër që do të votohet. Sepse, për të shkatërruar grupin qesharak të Saliut, nuk ka nevojë për 94 vota, por për politikë.
Politika amerikane deklaroi hapur: “Reforma shqiptare eshte interes shqiptaro-amerikan, dhe është kjo që është paraqitur”. Lakejtë e Saliut dolën hapur kur pohuan dje se “asnjë i huaj” nuk mund të jetë arbitri ynë; sepse ata kërkuan hapgjyqtarët që do gjykojnë korrupsionin shqiptar, duhet t’i zgjedhe dhe t’i heqë nga detyra, po korrupsioni shqiptar. Ky ishte fundi i tyre.
Amerikanët prapë u tallën me Saliun, sepse Ramës dje i bëri shenjë të hapur Presidenti amerikan në samitin e NATOs, kur e takoi veçanërisht në sy të të gjithëve. Pse vjen vërdallë, o Sali ziu, do mundësh Amerikën ti me katër ose pesë shigjetarë?
Nuk ka mundësi tjetër. Parlamenti do të votojë Reformën. Shqipëria është radhitur në luftë kundër terrorizmit, kurse NATO u deklarua hapur dje kundër Moskës. Atëherë, pse, politika amerikanë nuk e kupton që këta që janë kundër Reformes shqiptare janë mundësi potenciale ose e terrorizmit, ose e Moskës?
Ja pra, e shihni se sa e rëndësishme është Shqipëria sot për Perëndimin? Po antireformizmi shqiptar? Është më mirë për të, “të ulë kokën”, se nuk e ka forcën që t’i çojë Shqipërinë dhe shqiptarët sërish ne Lindje.
