Një gotë birrë me shokët në këtë kohë të nxehtë pas pune duket një ide mjaft e mirë. Por duhet të dini se pasi keni qenë në palestër apo keni bërë ushtrime fizike, kjo gjë nuk është e përshtatshme për fizikun tuaj…
Pas një ore stërvitjeje, në palestër apo në ajër të pastër, shumëkujt prej nesh mund t’i shkojë mendja për një birrë. Por a është veprim i zgjuar të pimë birrë në raste të tilla? Pasi djersijmë është mirë të pimë një gotë birrë apo më mirë të pimë thjesht ujë?
Shumë njerëz mendojnë se birra në këto raste mund të jetë një pije e mirë për të rimarrë energjitë e humbura, pasi përmban karbohidrate. Megjithatë, ajo çfarë trupi ynë ka nevojë pas ushtrimit është hidratimi. Kështu që alkooli mund të japë plotësisht efektin e kundërt.
Nëse doni patjetër të pini birrë, ju këshillojmë të konsumoni një birrë të lehtë me shumë pak alkool, por pas saj të pini ujë, si dhe të ushqeheni në mënyrën e duhur.
Këshilla më e mirë është të hidratoheni me ujë dhe të konsumoni proteina që treten lehtë, siç mund të jetë kosi me pak yndyrë, së bashku me një ushqim që është burim karbohidratesh, për shembull një banane. Në këtë mënyrë ju do ta merrni veten lehtë dhe shëndetshëm pas ushtrimeve në palestër. Më poshtë gjeni të renditura disa nga ushqimet që rekomandohen t’i konsumoni pas palestrës:
Avokado
Të japin energji dhe duhet t’i konsumoni para dhe pas stërvitjes. Mund t’i hani në sallatë ose si frutë.
Mandarinat
Janë fruta me vitamina esenciale dhe të japin shumë energji.
Kosi
Proteinat ndihmojnë në rigjenerimin e muskujve. Kosi grek ose, siç njihet ndryshe, kosi me yndyrë, nuk është një zgjedhje e keqe në qoftë se hani pa e tepruar.
Mishi
Pas stërvitjes një biftek është ushqimi i vetëm që mund t’ju kënaqë. Peshat e rënda dëmtojnë muskujt dhe mishi i kuq ju ndihmon për t’i riparuar.
Shalqi
Kjo frutë përmban një nivel të lartë uji. Gjithashtu duke ngrënë shalqi mund të përfitoni sheqernat që trupi ka nevojë dhe i keni humbur gjatë stërvitjes.
Bajamet
Ju ndihmojnë sa herë që ndiheni të uritur sepse kanë proteina. Por bajamet dhe gjalpin e tyre duhet ta konsumoni në pjesë të vogla.
Tërshëra
Është një ushqim që përgatitet shpejt dhe ka shumë fibra. Mund të shoqërohet me arra ose fruta. Tërshëra ju ndihmon për të tretur më thjesht ushqimet e konsumuara.
Vezë
Vezët janë të pasura me proteina, yndyra të shëndetshme dhe vitamina. Ato ju japin energji.
Lakra jeshile
Është një nga perimet më të shëndetshme. Ajo ju ndihmon në uljen e kolesterolit dhe shmang prekjen nga kanceri./shqip/a.k
