Një adoleshent, 20 vjeç, u arrestua nga policia e Nju Jorkut pasi tentoi të ngjitej në Trump Tower, nga dëshira e madhe për të takuar kandidatin republikan për president, Donald Trump, veprim që u përshkrua nga autoritetet si “një dredhi e motivuar”.
Policia tha se shtetasi amerikan nga Virxhinia do të përballet me akuza lidhur me incidentin, në të cilën ai shkaktoi dje një pështjellim në zemër të Manhatanit, duke u ngjitur në anën e jashtme të qiellgërvishtëses 68-katëshe.
Ai tani është nën vëzhgim, në një spital psikiatrik.
Policia u detyrua të hiqte një pjesë nga ana e fasadës prej xhami, në katin e 21-të të ndërtesës prej ku dy oficerë mundën ta kapnin atë dhe ta tërhiqnin brenda kundër vullnetit të tij.
Barrikadat u ngritën në rrugët e Nju Jorkut për të kontrolluar turmën e mbledhur, që brohoriste kur oficerët ndërhynë.
