Garbine Muguruza ka befasuar favoriten Serena Williams duke fituar finalen e “Roland Garros”, për “Grand Slam” turneun e parë në karrierë.
Në vetëm paraqitjen e saj të dytë në një finale të një “Grand Slam” turneu, Muguruza ishte më e mirë se Williams, përkundër problemeve me gabime të dyfishta në shërbim dhe shërbimin e dytë në përgjithësi.
Por, ajo prapë bëri mjaftueshëm për ta mbyllur ballafaqimin në dy sete të cilat i fitoi me rezultat 7-5 dhe 6-4. Muguruza, 22-vjeçe, nuk ishte favorite ndaj Williams, e cila triumfoi tri herë në të kaluarën në “French Open”.
Tenistja amerikane ishte në kërkim të titullit të saj të 22-të në një “Grand Slam” turne, që do ta barazonte rekordin e Steffi Graf për numrin më të madh të trofeve të fituar në epokën “Grand Slam”, citohet Zëri.
Kurse, Muguruza arriti suksesin më të madh në karrierën e saj. Ajo kishte arritur në rrethin e katërt në “Australian Open” dhe në raundin e dytë në “US Open”. Por, tani ka një titull “Grand Slam” me emrin e saj.
Ajo shfrytëzoi shërbimin e dobët të Williams dhe ishte e mirë në pikët e gjata, duke i rezistuar kundërshtares. (b.an)
