Një ngjarje e rëndë raportohet në Romë të Italisë. Një grua dhe një foshnje janë gjetur të pajeta, në rreth 300 m distancë nga njëra-tjetra, në parkun Villa Pamphili të kryeqytetit italian.
Rasti makabër u zbulua pasditen e djeshme, 7 qershor, shkruan Roma Today.
Dëshmitë e të rinjve që pikasën trupat teksa luanin volejboll, janë tronditëse.
“Mund të shihje një këmbë tek njëra qese plastike dhe një krah që kishte dalë te tjetra. Ishin të dyja lakuriq. E vogla dukej si një kukull…”, kanë thënë ata për policinë.
Dyshimet e para
Hetuesit besojnë se ekziston një lidhje mes dy vrasjeve, megjithatë pas analizës mjeko-ligjore të dy trupave, ra në sy se gruaja ishte në gjendje dekompozimi, ndryshe nga trupi i foshnjes.
Mbetet e paqartë edhe nëse ato janë nënë e bijë, kjo do të verifikohet pas testimit të ADN-ve. Hetuesit do të kontrollojnë kamerat e sigurisë në zonë, midis lagjeve Monteverde dhe Aurelio. Shpresa është që pajisjet të kenë filmuar personin ose personat që vendosën të heqin qafe të porsalindurën dhe gruan.
Pritet që të mësohen më shumë detaje mbi ngjarjen tragjike, ndërsa prokurori italian Antonio Verdi e cilësoi diçka absurde.
