Legjislacioni që rregullon përgjegjësitë për ushtrimin e profesionit të mjekut ishte në fokus të takimit që u zhvillua sot në mjediset e Ministrisë së Shëndetësisë me përfaqësuesë të institucioneve shtetërore e publike që kanë rol në mbarëvajtjen dhe rregullimin e këtij aktiviteti.
Në takimin e drejtuar nga Ministri i Shëndetësisë, Ilir Beqaj, ku ishin të pranishëm përfaqësuesë të Ministrisë së Drejtësisë, Prokurorisë së Përgjithshme, Institutit të Mjekësisë Ligjore, Avokatit të Popullit, Urdhrit të Mjekëve të Shqipërisë, Komisionerit për të Drejtën e Informimit dhe Mbrojtjen e të Dhënave Personale, Universitetit të Mjekësisë, Fakultetit të Drejtësisë të Universitetit të Tranës dhe Shkollës së Magjistraturës, u diskutua për vlerësimin e kuadrit ligjor aktual që rregullon përgjegjësite penale të mjekëve në ushtrimit të profesionit dhe mundësitë për përmirësimin e tij.
Kreu i shëndetësisë u shpreh midis të tjerash se, “ky takim do të ndihmojë në nxitjen e një diskutimi për vlerësimin e kuadrit ligjor për ushtrimin e profesionit të mjekëve, me qëllim qartësimin e pozicionit dhe përgjegjësive të tyre dhe krijimin e kushteve më të mira për ushtrimit të detyrës, por edhe krijimin e një klime të re mirëbesimi ndërmjet mjekut, pacientëve e qytetarëve”.
Ministria e Shëndetësisë i bën thirrje të gjithë të interesuarve që ti drejtohen secilit prej institucioneve që janë pjesë e këtij diskutimi për komente, sugjertime apo kontribute në këtë proces.
ma.me
