Në shkrimin me titull “FOTO/ Një person i shtrirë në rrugë, ambulanca vonon mbi 45 minuta,” të botuar sot (17/04/2016) në portalin “Panorama Online” pretendohet se janë dashur më shumë se 45 minuta që autoambulanca të mbërrijë për t’i ardhur në ndihmë një personi që ka pasur nevojë për shërbimin e urgjencës mjekësore, duke i’u referuar postimit në rrjetet sociale të gazetares J. Mançellari, e cila citohet të ketë shprehur indinjatën e saj për moskorrektesën dhe papërgjegjshmërinë me të cilën funksionon, sipas saj, sistemi shëndetësor në vendin tonë.
E vërteta është krejt ndryshe. 
Siç edhe mund të verifikohet fare lehtësisht nga dokumentacioni i shërbimit të urgjencës dhe regjistrimi elektronik i aktivitetit të lëvizjes në terren të autoambulancës “TR 9917 K Urgjenca Tiranë”, thirrja për t’i ardhur në ndihmë personit në nevojë është marrë nga centrali i shërbimit të urgjencës mjekësore në orën 10:27 dhe orari i mbërritjes së autoambulancës te vendodhja e personit në nevojë shënon kohën 10:37, dhe orari i mbërritjes në spital shënon orën 10:42.
Pra, siç mund të shihet qartësisht, autoambulancës i janë dashur më pak se 10 minuta, dhe jo 45 minuta siç pretendohet në shkrimin e sipërpërmendur, për të mbërritur në vendodhjen e personit në nevojë pas marrjes së thirrjes.
