Një person është shpëtuar i gjallë pasi kaloi tetë ditë i bllokuar nën rrënojat e një ndërtese të shembur nga tërmetet e dyfishta që goditën Venezuelën.
Hernán Gil u nxor nga ekipet e shpëtimit më shumë se 100 orë pasi ishte lokalizuar për herë të parë nën rreth 140 ton rrënoja. Operacioni u cilësua nga një zjarrfikës kilian si “pa dyshim më kompleksi dhe teknikisht më i vështiri” në të cilin ai kishte marrë pjesë ndonjëherë.
Sipas autoriteteve, deri të enjten në mbrëmje, numri i viktimave nga tërmetet e 24 qershorit ka arritur në 2,595, ndërsa dhjetëra mijëra persona vazhdojnë të rezultojnë të zhdukur.
Allan Madrigal, ndihmës mjekësor i Kryqit të Kuq të Kosta Rikës, tha se Gil doli “në formë të përsosur” pas kësaj përvoje të jashtëzakonshme. Ishte pikërisht Madrigali ai që dëgjoi britmat e dobëta të Gilit për ndihmë nga rrënojat të dielën.
“Ishte një moment emocional. Në fillim nuk u besova veshëve të mi dhe i kërkova një kolegu të konfirmonte se nuk po e imagjinoja”, rrëfeu ai.
Pas zbulimit të vendndodhjes së tij, ekipet e shpëtimit nisën një operacion të ndërlikuar për ta nxjerrë të gjallë.
Gil ishte duke punuar si roje sigurie në një kabinë të vogël betoni në bodrumin e parkingut pranë qendrës tregtare Galerias Playa Grande në Catia La Mar, kur ndodhën tërmetet. Kabina, sipas shpëtimtarëve, krijoi një hapësirë mbrojtëse që e ruajti nga shembja e rreth 140 tonëve rrënoja.
“Ai na tha se nuk kishte as edhe një gisht të shtypur”, deklaroi një tjetër punonjës i Kryqit të Kuq të Kosta Rikës pak para nxjerrjes së tij.
Gjatë kohës që ishte i bllokuar, Gil mori ujë dhe ndihmë mjekësore përmes një linje intravenoze, ndërsa ekipe nga Venezuela, Kili, Kosta Rika, El Salvadori, Meksika, Portugalia dhe Shtetet e Bashkuara punuan pa ndërprerje për ta shpëtuar.
Operacioni u përball me vështirësi të mëdha, pasi disa nga tunelet e krijuara për të arritur te Gil u shembën disa herë, duke rrezikuar si jetën e tij, ashtu edhe të shpëtimtarëve.
Gjatë natës, ekipet arritën më në fund të vendosnin kontakt vizual me të mbijetuarin. Në pamjet e filmuara nga një kamerë e vogël e futur mes rrënojave dëgjohej një zjarrfikës kilian që i kërkonte Gilit të kthente kokën drejt kamerës, pak çaste para se ai të nxirrej i gjallë.
