Një grua 32-vjeçare, e cila kishte mbetur e bllokuar nën rrënoja për 36 orë pas tërmetit me magnitudë 7.4 ballë që tronditi Kolumbinë perëndimore, është shpëtuar gjallë.
Daniela Largo u nxor nga poshtë një ndërtese të shembur në qytetin e Pereira-s pas një operacioni shpëtimi që zgjati 10 orë.
Zjarrfikësit më në fund arritën ta arrinin atë nëpërmjet një tuneli që kishin hapur poshtë katër pllakave të betonit, nën të cilat ajo ishte “varrosur”.
Të paktën 188 persona kanë vdekur nga tërmeti, sipas shifrave zyrtare, dhe qindra të tjerë mbeten të zhdukur.
Në Pereira, një qytet në rajonin e kultivimit të kafesë në Kolumbi, 79 persona janë konfirmuar të kenë vdekur, numri i dytë më i lartë pas Calit, ku 95 persona kanë vdekur, sipas shifrave nga Shoqata e Kryeqyteteve Kolumbiane, Asocapitales.
Pasi punonjësit e emergjencës mbërritën në vendngjarje, ata arritën ta gjenin Largon me ndihmën e një kamere të vogël.
Megjithatë, shpëtimi i saj u ndërlikua nga fakti se katër pllaka të rënda betoni po bllokonin rrugën.
Zjarrfikësit vendas, të ndihmuar nga kolegët e vendosur nga kryeqyteti, Bogota, dhe ekipi i reagimit ndaj katastrofave të forcës policore kombëtare, u desh të gërmonin dy tunele për të arritur tek ajo.
Përmes një hapjeje, të gërmuar nga lart, ata arritën t’i siguronin Largos oksigjen. Por vetëm nëpërmjet një tuneli të dytë, të gërmuar nga poshtë, ata arritën ta lironin atë.
Presidenti kolumbian Abelardo de la Espriella festoi shpëtimin e saj në mediat sociale, duke e përshkruar atë si “lajm që na mbush me shpresë”.
Në Pereira, të paktën 92 ndërtesa u shembën. Pesëmbëdhjetë persona dihet se janë të bllokuar dhe 37 të tjerë janë raportuar të zhdukur, sipas Asocapitales.
Në Cali, qyteti i tretë më i populluar i Kolumbisë, më shumë se 200 njerëz mbetën të bllokuar që nga ora 16:00 sipas orës lokale të së martës.
Kryetari i bashkisë së qytetit shpalli një shtetrrethim gjatë natës dhe tha se ushtarët do të jenë në patrullim në zonat më të goditura të Calit.
Tërmeti me magnitudë 7.4 ballë goditi të hënën në orën 07:34 sipas kohës lokale. Epiqendra e tërmetit ishte pranë fshatit San Jose del Palmar, në provincën Choco, por u ndje në një zonë të gjerë.
Sizmometrat më afër epiqendrës regjistruan dridhje që zgjatën midis 90 sekondave dhe dy minutave. Që atëherë ka pasur më shumë se 100 lëkundje pasuese.
