MPB: Falënderojmë PD-në që u bën jehonë sukseseve tona
Ministria e Punëve të Brendshme ka reaguar ndaj akuzave të sotme të Partisë Demokratike ndaj kreut të këtij institucioni, Saimir Tahiri, si “i lidhur me bandat e trafikut”.
Sipas MB-së, partia kryesore e opozitës në fakt u bën jehonë sukseseve të punës së kësaj ministrie. “Nuk ka mbetur asgjë tjetër përveçse ta falënderojmë Partinë Demokratike që me konferencat e saj të përditshme për të përbaltur sukseset e Policisë së Shtetit, në fakt u bën jehonë këtyre sukseseve që po shënojnë një kthesë historike në rrugën e ndërtimit të shtetit modern evropian shqiptar”, thuhet në reagimin e zyrës së shtypit të Ministrisë së Brendshme.
“Falënderimet tona janë edhe më të veçanta, kur PD-ja u bën jehonë goditjeve me zero tolerancë ndaj çdokujt që nën kostumin e pushtetit të maxhorancës apo i lidhur në cilëndo mënyrë me përfaqësuesit politikë të maxhorancës, goditet me forcën e ligjit për shkeljen e ligjit. Urojmë që Partia Demokratike të mos pushojë asnjë ditë në këtë përpjekje të dëshpëruar për të, por të mirëseardhur për qeverinë tonë, e cila edhe falë konferencave të baltës së SHQUP-it përçon te shqiptarët mesazhin e saj kryesor: Koha e të fortëve të veshur me pushtet apo e të paprekshmëve për shkak të lidhjeve me pushtetin, ka vdekur bashkë me pushtetin e korruptuar të Sali Berishës. Kjo është koha e Rilindjes së besimit të shqiptarëve te Shqipëria dhe shteti evropian i shqiptarëve”, vijon reagimi i MB-së.
Redaksia Java News/ f.g
