Sot në ambientet e klubit të Partizanit është mbajtur një mbledhje nga drejtuesit për situatën që po kalon klubi i kuq. Këshilltari i presidentit Gazmend Demi, Luçiano Moxhi, në përfundim të kësaj mbledhje nuk i ka kursyer kritikat për sulmuesin Edgar Çani të cilin e afroi me shumë bujë.
“Na vjen keq që nuk fituam dot, por mendoj se kemi një problem në sulm! Për fat të keq gjuajtëm vetëm një herë në portë dhe kur nuk ke një sulmues që finalizon punën e skuadrës atëherë bëhet më e vështirë! Do të shohim nëse Cani do të rikuperohet në kohë apo jo, por në të kundërt duhet të shohim për një sulmues tjetër!
Kam respekt për Canin, por edhe respekti ka një kufi zgjat aq sa mund të zgjasë! Tani mendoj se duhet të flasim edhe në aspektin profesional dhe këtu ndryshon biseda me Canin! Do shohim çfarë do të ndodhë në të ardhmen sepse edhe kështu nuk shkon…”, tha Moxhi për “Panorama Sport” pas mbledhjes./a.m.
