Ministria e Arsimit ka vendosur pezullimin e mësimit ditën e premte. Vendimi prek të gjitha institucionet arsimore parauniversitare në vend.
Sipas njoftimit të ministrisë, shkak për këtë vendim është bërë përkeqësimi i kushteve të motit. Dita e humbur e mësimit është parashikuar të zëvendësohet një ditë tjetër.
“Për shkak të përkeqësimit të motit në të gjithë vendin, si dhe nga informacionet e marra nga Drejtoritë Arsimore Rajonale dhe Zyrat Arsimore mbi situatën e reshjeve të dendura të shiut, Ministria e Arsimit, Sportit dhe Rinisë njofton pezullimin e procesit mësimor, në datën 01 dhjetor 2017, në të gjitha institucionet arsimore të arsimit parauniveristar”, thuhet në njoftim.
Ndërkohë, Presidenti Ilir Meta ka reaguar lidhur me situatën e krijuar si pasojë e reshjeve intensive të shiut. Kreu i shtetit shkruan në rrjetet sociale se po e ndjek me vëmendje situatën e krijuar si dhe masat e marra nga autoritetet.
Meta ka shprehur solidaritet me banorët e zonave të prekura dhe punonëjsit e Emergjencave Civile.
Postimi i Metës:
Jam duke ndjekur me vëmendje të veçantë situatën e krijuar si pasojë e motit të keq dhe masat që po merren për tejkalimin e saj në disa zona të përmbytura.
Solidarizohem me banorët e këtyre zonave dhe punonjësit e Emergjencave Civile duke apeluar angazhim maksimal për sigurinë e jetës dhe të pronës.
/a.m.
