Moti i keq me temperatura të ulta dhe deti i trazuar ne brigjet italiane kanë vonuar nisjen e trageteve të linjës Bari – Durrës. Tragetet “Rhapsody” dhe “Rigel I” me udhëtarë dhe automjete janë nisur nga Bari (Itali) sot rreth orës 08.00, me një vonesë prej 9 orësh. Po ashtu edhe trageti “Rigel II” është nisur nga Durrësi drejt Barit me afro 4 orë vonesë.
Sipas burimeve të APD, dy tragetet nga Bari parashikohet të mbërrijnë në Durrës sot rreth orës 15.00.
Reshjet e deborës që ranë natën e kaluar si dhe moti i ftohët kanë ndikuar në vonesat e fillimit të procesit të përpunimit të anijeve në port. Anijet tregtare “Vela I” dhe “Angela” që po shkarkojnë në kalatat 1 dhe 4 mallra si, bërsi ulliri dhe ure, kanë nisur procesin e përpunimit rreth orës 10.00. Ndërkaq, sapo janë ankoruar në kalatat 5 dhe 10 anijet “Thunder” dhe “Edro IV”, të cilat do të fillojnë menjëherë procesin e ngarkim-shkarkimit. /a.m.
