Moti i keq që ka mbërthyer vendin në 24 orët e fundit ka shkaktuar disa problematika në qarqe të ndryshme të vendit.
Agjencia Kombëtare e Mbrojtjes Civile informon se reshjet e shiut, që në disa zona të vendit kanë qenë me intensitet të lartë kanë shkaktuar bllokim të disa akseve rrugore, veçanërisht në qarkun e Shkodrës.
Përgjithësisht, situata është pa problematika serioze sa i përket infrastrukturës kombëtare, por në aksin Prekal – Kir, strukturat po punojnë për hapjen e rrugës, ndërsa rruga Mes-Dukagjin është bllokuar për shkak të rrëshqitjes së gurëve.
Si pasojë e motit të keq, disa zona janë pa energji për shkak të defekteve në rrjet. Rajone të ndryshme, përfshirë Tiranën, Durrësin, Elbasanin, Berat, Vlorën, Korçën, Gjirokastrën, Kukësin, Shkodrën dhe Burrelin, po përballen me ndërprerje të energjisë elektrike në zona të caktuara. Punonjësit e OSSH janë në terren dhe po punojnë për riparimin e defekteve dhe rikthimin e furnizimit me energji në këto zona.
AKMC është në kontakt me të gjitha prefekturat dhe bashkitë, për të koordinuar punën në çdo rast nevoje, me situatën që po ndiqet me vëmendje nga strukturat e Mbrojtjes Civile në nivel vendor dhe qendror.
/a.r
