10 të vdekur, një i zhdukur, shumica viktima të pemëve të thyera: situata në rajonet më të prekura prej motit të keq në Itali është dramatike
“Alarmi i kuq” deri në 15 në Liguria, ka detyruar mbylljen e aeroportit ” Kristofor Kolombi”në Xhenova deri në orën 14:00.
Erërat e fuqishme janë mbi 100 kilometra në orë, ndërsa dallgët e detit shkojnë deri në 7 metra. Në 48 orë, sipas asaj që raportojnë mediat italiane, ka pasur mbi 7 mijë ndërhyrje të ekipeve të shpëtimit të kryera në të gjithë vendin.
3 të vdekur u regjistruan në Lacio e një në Kampania; dy janë jetët e humbura në Frozinone për shkak të një peme të përplasur mbi makinën me të cilën udhëtonin. Moti ekstrem ka shkaktuar probleme thuajse në të gjithë vendin, shkruan “Corriere della Sera”, me shira të rrëmbyer, përmbytje, erëra që mbërrinin shpejtësinë 100 km/h e në disa zona ka pasur edhe tromba të mirëfillta ajri.
Në qytete të ndryshme, duke nisur nga Roma, shkollat u mbyllën të hënën e nuk do të hapen as gjatë ditës së sotme. Kulmin e saj, furia e motit, sipas Mbrojtjes Civile, e arriti pasditen e një dite më parë, me reshje të rrëmbyera në të gjithë veriun e vendit, sidomos në alpe.
Ndërhyrjet e zjarrfikësve kanë mbërritur një nivel rekord: 1 600 vetëm të hënën, shumica ishin në Toskanë; alarmi i kuq do të vazhdojë të mbetet në fuqi edhe sot për rajonet më të goditura: Veneto, Friuli, Venecia, Xhulia, Trentino Alto Adixhe, Lombardi dhe Liguria.
Edhe Venecia u përball me një baticë frikësuese që përmbyti gati 70% të qendrës historike të saj. Shpresat janë që situata të qetësohet disi më vonë gjatë ditës.
Problemet e motit në Itali janë bërë shkas për vonesa të mëdha të lëvizjes së trageteve nga Bari drejt Durrësit. Ndërkohë, Kapiteneria e Përgjithshme i ka dërguar një urdhër autoriteteve të 4 porteve në vend, pasi do të ketë një përkeqësim të situatës në det përgjatë 48 orëve të ardhshme. Kërkohet që të ndalohet lëvizja e mjeteve të vogla në det. Po njoftohen të gjitha agjensitë, tragetet, peshkarexhat dhe anijet e transportit të mallrave për situatën e përkeqësuar dhe të marrin masa.
Njoftimi i Autoritetit Portual Durrës mbi situatën:
Era e fortë dhe deti i trazuar në të dy anët e Adriatikut kanë penguar lundrimin në orar të trageteve të linjës Durrës – Bari dhe Bari – Durrës.
Nga të dhënat e Qendrës së Informacionit në APD, mësohet se tragetet “Bari” dhe “AF Francesca”, të cilët duhet të niseshin nga porti i Barit natën e kaluar kanë nisur lundrimin drejt Durrësit vetëm sot rreth orës 7.00. Këto tragete pritet të mbërrijnë në portin e Durrësit pas 7-8 orësh.
Vonesa ka patur edhe në nisjen nga Durrësi drejt Barit për tragetin “Rigel”, i cili është larguar nga porti rreth orës 5.30.
Vetëm trageti “AF Marina” është nisur po ashtu nga Durrësi natën e kaluar, por me vonesa shumë të vogla.
Kushtet detare aktualisht janë më të mira se sa natën e kaluar, por lundrimi në det mbetet i vështirë-thanë burimet e APD.
/a.ç
ANSA/MASSIMO PERCOSSI
