Ministri i Transporteve Sokol Dervishaj ka reaguar pas akuzave të Partisë Demokratike për neglizhencë sa i takon situatës së krijuar nga bora dhe ngricat në akset rrugore të vendit.
Sipas Dervishajt këto deklarata politike përhapin panik të panevojshëm.
“Ministria dhe Institucionet e tjera kanë marrë masat për përballimin e situatës. Kam apel që në këto ditë mos të bëjmë deklarata për të përfituar politikisht. Duhet të jemi të kujdesshëm pasi deklarata të nxituara ngjallin panik të panevojshëm. Në këto ditë është e rëndësishme të solidariozohemi” deklaroi ai.
Kjo deklaratë e Dervishajt nga Bulqiza ku ai ishte për inspektim vjen disa orë pas akuzave të Edmond Spahos, i cili deklaroi sot nga selia e PD, se gjysma e vendit është e izoluar dhe pa drita.
Ministri Transportit Sokol Dervishaj dhe deputeti i LSI, Përparim Spahiu inspektuan në Urën e Cerenecit në Bulqizë.
“Pavarësisht situatës nuk ka asnjë problem në qarkullim. Situata e qarkullimit është në kontroll të vazhdueshëm dhe janë marrë masat e domosdoshme. Firmat kontraktore dhe Ministria janë në gatishmëri me masa shtesë në këto ditë. Firmat kontraktore kanë hedhur sasi të mëdha kripe në cdo aks. Qytetaret sidomos në zonat malore të kenë kujdes dhe të përdorin zinxhirët” deklaroi Ministri Transportit Sokol Dervishaj./a.m.
