Pavarësisht motit të keq, që ka përfshirë vendin prej tri ditësh, me reshje të dendura shiu, dëborë dhe erë të fortë, të gjitha akset nacionale në vend janë të kalueshme.
Kjo u bë me dije nga drejtori i përgjithshëm i Agjencisë Kombëtare të Mbrojtjes Civile, Haki Çako.
Çako tha se prezenca e lartë e reshjeve të dëborës në veri ka krijuar vështirësi në rrugët rurale, pothuajse në të gjitha njësitë administrative. Ai theksoi se të gjitha strukturat janë në terren për përballimin e situatës së krijuar.
“Të gjitha strukturat dhe njësitë e pushtetit vendor kanë marrë masat për përballimin me sukses të situatave të krijuara nga faktorët atmosferikë. Aktualisht, zona e veriut e përfshirë pothuajse e gjitha nga reshje të konsiderueshme dëbore, ndodhet në mbikëqyrje të plotë nga të gjitha strukturat. Zona të shumta të të gjitha njësive në zonat rurale kanë probleme me rrugët, por akset nacionale janë të hapura. Në Vlorë situata është nën kontroll dhe nuk ka prezencë uji”, u shpreh Çako.
