Rreth 400 pasagjerë, shumica shqiptarë, nga dy fluturime të Wizz Air që udhëtonin nga Bolonja dhe Bergamo drejt Tiranës, janë detyruar të ulen në mënyrë të menjëhershme në aeroportin e Brindisit për shkak të motit të keq që ka përfshirë prej dy ditësh vendin tonë.
Sipas raportimeve të mediave italiane, La Repubblica të paktën 100 pasagjerë kanë dalë në pistë duke kërkuar përgjigje të menjëhershme nga kompania. Aeroporti i Brindisit ka konfirmuar se pasagjerët janë asistuar, por situata mbetet tensionuar dhe protestuesit nuk janë larguar. Policia ka ndërhyrë në vendngjarje për të menaxhuar situatën.
Aeroporti i Puglias ka aktivizuar një plan emergjence, duke vendosur autobusa që do të transportojnë pasagjerët drejt Bolonjës dhe Bergamos. Megjithatë, pasagjerët shqiptarë kërkojnë të udhëtojnë direkt drejt Tiranës. Autoritetet theksojnë se operacionet e tjera të aeroportit vazhdojnë normalisht, pavarësisht protestës.
