Reshjet e dendura të borës dhe temperaturat shumë të ulëta po sjellin kaos në trafikun ajror dhe rrugor në Europë këtë javë. Aeroportet kryesore si ai i Amsterdamit “Schiphol” kanë anuluar qindra fluturime për shkak të borës, erës dhe ngricave që bëjnë pistat të pasigurta.
Mbi 1 000 pasagjerë kanë qëndruar të bllokuar në terminale, ku stafet kanë vendosur dyshekë dhe ofruar mëngjes për udhëtarët e detyruar të presin.
Situata e vështirë ka vazhduar edhe në Paris, ku aeroportet Charles de Gaulle dhe Orly kanë anuluar dhjetëra fluturime për shkak të motit të ftohtë dhe borës. Transporti urban është ndikuar gjithashtu, me autobusë dhe shërbime të tjera publike që u pezulluan përkohësisht për shkak të akullit dhe kushteve të rrezikshme në rrugë.
Aktualisht stafit hekurudhore raportojnë vonesa dhe ndërprerje të shërbimit në disa linja, për shkak të borës që ka mbuluar shinat dhe pajisjet e ngrira.
Autoritetet sinjalizojnë se situata mbetet e paparashikueshme dhe paralajmërojnë për më shumë reshje dhe erëra të forta në ditët në vijim. Stuhia e quajtur “Goretti” ka shkaktuar pezullime edhe në aeroportet e Belgjikës, Gjermanisë dhe Mbretërisë së Bashkuar.
Në Britani, shërbimet hekurudhore dhe rrugore kanë patur ndërprerje, ndërsa temperaturat bien shumë nën zero. Meteorologët paralajmërojnë se i ftohti ekstrem dhe bora do të vazhdojnë të ndikojnë trafikun dhe jetën e përditshme në shumë zona të kontinentit.
Udhëtarët këshillohen të kontrollojnë rregullisht gjendjen e fluturimeve dhe të shmangin udhëtimet e panevojshme.
Autoritetet e transportit rekomandojnë kujdes maksimal për shkak të kushteve të rrezikshme në rrugë dhe hekurudha. Situata pritet të qëndrojë sfiduese edhe ditët e ardhshme, ndërsa reshjet dhe akulli vazhdojnë të destabilizojnë trafikun në mbarë Europën.
