Ambasada ruse në Tiranë ka konfirmuar se trupat e katër turistëve që humbën jetën në Qerret janë dërguar sot drejt vendit amë.
Në deklaratë, ambasada njofton se ligji rus e lejon që atyre t’u kryhet një ekspertizë tjetër për të zbuluar shkaqet e vdekjes.
Më herët mediat njoftuan se djali i vetëm i familjes ruse që u shua në Qerret, Aleksandër Burenkova, ka mbërritur në Tiranë për të tërhequr trupat e dy prindërve të tij Sergei Burenkova, 60 vjeç e Nataliia Burenkova, 58 vjeçe, të motrës së tij Ekaterina Burenkova dhe të fejuarit të kësaj të fundit, Nikita Belousov.
DEKLARATA E AMBASADËS:
Në mëngjesin e hershëm të 22 tetorit trupat e pajetë të shtetasve rusë, të cilët humbën jetën në 15 tetor në territorin e Republikës së Shqipërisë, u nisën në Rusi me një fluturim të rregullt.
Sipas legjislacionit rus, mund të kryhet një ekspertizë mjeko-ligjore shtesë për të zbuluar shkaqet e vdekjes së tyre.
Shpresojmë në marrjen sa më të shpejtë të përfundimeve zyrtare nga pala shqiptare, si edhe në bashkëpunimin e mëtejshëm të ngushtë të organeve ligjzbatuese ruse dhe shqiptare për sqarimin e rrethanave të tragjedisë.
/a.r
