Frika nga sulmet terroriste ëhstë rikthyer sërish. Kryeqyteti rus Moska është përfshirë nga paniku gjatë orëve të pasdites të së enjtes.

9 sinjalizime për vendosje bombash janë dhënë në disa qendra tregtare në zona të ndryshme të kryeqytetit.

Alarmet janë dhënë nga persona të paidentifikuar që kanë telefonuar policinë në orare thuajse të njëjta për të gjitha sinjalizimet.

Sipas mediave vendase, bëhet me dije se rreth 10 mijë njerëz janë evakuuar, ndërsa policia ka nisur kontrollet në qendrat tregtare.

Momentalisht nuk ka ende një reagim zyrtar të autoriteteve, lidhur me alarmin e përhapur në 9 qendra të mëdha tregtare në kryeqytetin rus.

Ndërkohë mediat vendase bëjnë të ditur se policia po verifikon ndërtesën ku është vendosur administrata presidenciale e Rusisë, në rrugën “Ilyinka” në qendër të Moskës, pasi ka marrë një sinjalizim për vendosjen e një bombe në godinë.