Deputeti i PS, Erjon Braçe është i ftuar në emisionin ’45 Minuta’ në Report Tv, ka folur për kthimin e buxhetit nga Presidenti i Republikës Ilir Meta, protestën e studentëve, aksionin e opozitës PD-LSI, por edhe zhvillimet brenda PS në prag të zgjedhjeve lokale.
Protesta e studentëve, Braçe: Problemi i tarifave i zgjidhur, buxheti 5% nuk bëhet
Erjon Braçe shprehet se prej disa ditësh një grup i ngritur në Kryeministri po punon për kërkesat e studentëve. Ai thekson se çështja e tarifave është e zgjidhur, por kërkohet dialog me studentët, ndërsa kërkesa për rritjen e buxhetit 5% nuk bëhet. Për çështjen e tarifave, Braçe tha se nuk ishte e nevojshme që të rikthehej buxheti për shqyrtim nga Meta, pasi është e financuar nga burimet e buxhetit të shtetit. “Kërkesat e paraqitura nga studentët janë shqyrtuar dhe janë pranuar. Por është një pakicë që kontrollohet nga forumet partiake për këtë çështje. Kryeministri ka udhëhequr një grup pune që i ka shqyrtuar. Është ndërtuar një paketë e plotë në përgjigje të kërkesave dhe është e financuar plotësisht. Kërkesa për dyfishimin e buxhetit për arsimin ka dalë në ditën e shtatë. Çështja e tarifave është e financuar nga burimet e buxhetit të shtetit.
Nuk mund të dalë VKM-ja, pasi është çështje në diskutim. Ata kanë marrë kontrollin e protestës para Kryeministrisë. Çështja e tarifave është e zgjidhur plotësisht nuk ka nevojë për aktin që ka bërë Presidenti, ka nevojë vetëm për dialog për skemën. Kam gjashtë ditë që diskutoj për këtë çështje. Pika e buxhetit nuk ka qenë as në ditën e parë, as të dytë, por ka dalë në ditën e shtatë. Për këtë pikë nuk ka dakordësi fare, e ka thënë edhe Rama që pardje. Që të bëhet 5% e GDB, në dollarë është 725 mln dollarë, por ne duam lekë edhe për bujqësinë. Buxheti duhet të ketë ekuilibër, pasi mund të kthehet në plaçkitje për sektorët e tjerë”tha Brace.
‘Buxheti’
Braçe: Dekreti s’ka firmë, ligji u dërgua dje në Presidencë, Meta ndodhet jashtë, si e shqyrtoi?
Presidenti Meta riktheu për shqyrtim ligjin për buxhetin pas protestës dhe kërkesave të studentëve për arsimin. Por kryetari i Komisionit të Ekonomisë, Erjon Braçe thotë se ligji u dërgua vetëm dje në Presidencë, ndërkohë që Meta ndodhet jashtë vendit dhe sot u shpreh duke e rikthyer. Braçe ngre pyetjen si e shqyrtoi Presidenti kaq shpejt buxhetin. Sipas tij vendimi reflekton qëllime të pastra partiake duke e lidhur me LSI-në.
“Kam një pyetje kush President? Ku është dekreti i Presidentit? Ky është njoftim për shtyp. Ligji për buxhetin e shtetit të vitit 2019 është dorëzuar dje paradite i zbardhur nga Kuvendi, datë 12.12.2018. Këtu nuk është firma e Presidentit. Ky shtet nuk është serioz. Ligji është dorëzuar dje. Tani kam dy gjëra; Presidenti është larguar dje nga vendi, ndërkohë që ky dokumentet është dorëzuar, Presidenti nuk ka qenë në zyrë. Kjo tregon mungesë serioziteti.
Presidenti nuk është në Shqipëri, si e ka shqyrtuar? Kjo një pyetje akoma më e madhe se firma. Ligji është dorëzuar dje, ai nuk ka qenë në zyrë. Si e mori informimin për buxhetin e arsimit të lartë Nuk ka. Vendimi reflekton qëllimi të pastra partiake. Nuk e kam hallin fare te firma apo dekretimi në mungesë. E kam hallin në mungesë totale të shqyrtimit, nëse gjërat dekretohen pa u shqyrtuar, kjo është fatkeqësi e madhe për këtë vend. Nëse Presidenti do të kishte njohur me detaje buxhetin nuk do ta kishte kthyer, sikur pretendon LSI, ish-partia e Presidentit. Edhe prej andej më vjen mosnjohja e akteve të buxhetit”tha ai./a.meta
