Komisioni Qendror i Zgjedhjeve, dy ditë më parë njoftoi me postë të 57 kandidatët nga listat e PD dhe LSI, të dorëzojnë formularët e vetdeklarimit. Këtë hap KQZ e ndërmori pas dorëheqjes së anëtarëve të opozitës, të cilët ishin pjesë e Parlamentit dhe pas krijimit të vakancave.
Ndërkohë, mësohet se LSI-ja, po përballet me “rrjedhje” kandidatësh.
Burime për CNA.al bëjnë të ditur se kandidati i LSI-së në Elbasan, i cili ishte në listë pritëse, Enver Roshi ka pranuar mandatin. Kujtojmë se në Elbasan nga radhët e LSI janë zgjedhur si deputetë Monika Kryemadhi dhe Edmond Haxhinasto.
Të njëtat burime saktësojnë se Roshi sapo ka dorëzuar formularin e vetdeklarimit në KQZ.
Kujtojmë këtu se edhe katër deputetë të tjerë, nga PD dhe LSI nuk i kanë dorëzuar ende mandatet, përkatësisht Lefter Koka dhe Robert Bitri, Myslim Murrizi dhe Rudina Hajdari, të cilët së bashku me Enver Roshin e cojnë në 82 numrin aktual të deputetëve në parlament.
Por, nga ana tjetër edhe PD po has probleme në qarqe. Një ditë më parë u mësua se rreth 15 kandidatë të PD-së, që janë në listat pritëse, nuk pranojnë të dorëzojnë dorëheqjen dhe me shumë gjasa pritet që të dorëzojnë formularin në KQZ dhe të marrin mandatin e deputetit.
Kjo do të çonte në krijimin e një opozite të re, dhe numri i deputetëve në Parlament do të arrinte në rreth 95, nga 140 vende që janë në total.
/a.rada
